Kum 2020 Mizo Studies Issue hmasa ber chu tluang takin a chhuak leh thei ta. Kumina chhuak hmasa ber a nih angin kumthar chibai ka buk a che u. He Journal hi kum 2012-a chhuah ṭan a nih aṭangin khaihlak awm lovin tluang takin tih chhuah a ni thei zel a, a lawmawm hle a ni. Kum khata ṭum li lai chhuak (quarterly) a nih avangin thuziak chhuah tur lak khawm leh buaipui kawngah a buaipuitute pawh an rim thei hle.
Mizo Studies chhuah ṭan tirh aṭangin Mizo Department, MZU-a Head of Department apiang hi Editor an ni ṭhin a. Kumin aṭang hian Editor hna hi zirtirtuten in thawh chhawk ni se kan tih tak avangin Editor hna hi ka koah a tla ta a ni. Mizo Studies-ah hian English leh Mizo huanga thuziak dah ṭhin a ni a, kumin aṭang chuan kan tih ṭhin dan thlakin Mizo huang hi a hmasa zawkah dah zelin English huang hi a hnuhnung lamah dah a ni thung ang.
Mizo Studies-a thuziakte hi mi thiam endik tir ṭhin a ni a, zirna huang hrang hranga thuziakte chhuah ṭhin a ni. Amaherawhchu, Research Article ziah dan phung a theih ang anga zawm tlat kan tum avangin thuziak tam tak hnawl a awm ṭhin. He Journal hi zirlai te, research timêk-te leh zirtirtu eng emaw zatin an chhawrin an hlawkpui thu an sawi kan hre fo a, a lawmawm hle a ni. Thuziak pangngai bakah Department-in programme pawimawh hrang hrang a hman ṭhinte tar lan a ni ṭhin bawk. Kuminah pawh February 21, 2020 Mother Tongue Day pualin mahni pianpui ṭawng hlutna leh inzirtirna programme pawimawh tak Mizo department chuan kan hmang a ni.
Ṭhahnemngai taka thu rawn thawh ṭhin tute chungah lawmthu kan sawi a, he Journal hi ṭangkai taka lo hmang zel turin kan beiseiin duhsakna kan hlan a che u.
