Zo Hnahthlâk Min Tipumkhattu Hla Ṭhenkhat

— HC Zonunthara
Asst. Professor, Government Lawngtlai College

 

Literature kan tih hi sawi fiah thiam a har hle a, literature hi khawvel thil mawi (Art) zinga mihring lungdum ber a ni a, a chhui zau leh chhui thuk apiangin an hlimpuiin an tuipui leh zual ṭhin.  A chhan chu, literature hi mihring nun sawi chhuahna, mihring ngaihnawm tih zawng, hriat reng duh zawng, thufing leh suangtuahna leh duhthusam thu leh hla mâwi lungkuai tak takte tarlanna a nih vang a ni. Thu ziaktu emaw hla phuahtu emaw phenah hian hnam pakhat nunphung leh rilru sukthlek a awm tlat ṭhin. A ziaktu rilru sukthlek leh duh dan te leh khaw hawi zau zawng erawh chuan a hril thui thei viau tho ang a, thu fing leh thu mâwi hmanga hringnun awmze neia puan chhuahna a nih avangin hriat loh kârah thinlung a hnehin, mi nunah ram a la chak em em mai a; chuvangin, Zofate nunah pawh literature hian hmun a luah thûk tawlh tawlh dawn a ni.

 

Literature zeṭhuang pathum zingah hian ‘Hla’ hian mi a huap zo ber mai awm asin. Hnam tin hian hla hi eng tik lai khân nge kan neih ṭan tih hi chiang taka hriat theih tak tak a ni lo. A chhan chu hla leh hringnun hi inzawm tlat a nih vang a ni. Kan lungngaihna chu hlain kan chham chhuak a, kan hlimna leh làwmna pawh hla thoin kan tarlang ṭhin. Hringnunah hian lungngaihna leh làwmna hi eng tik lai pawha thleng reng a ni a, hringnun hi làwmna, lungngaihna leh tawrhnaa khat a ni miau a le! Chuti taka hla leh hringnun hi inzawm thûk a nih avangin hla hian thinlung a khawih hma em em mai a, hlain hringnuna thil a tih theihzia hi sawi fiah sen rual a ni lo. Kum 1914 Indopui Pakhatna-a German sipai leh British sipai te inep nasat vanglai tak mai pawh khan, ‘Silent Night’ hla hian Krismas zan reh laiin hun hlimawm tak a lo hman duntir tawh asin.

 

Zo hnahthlâk insuih khâwm nan hian hla hi hmanraw ṭha tak a ni a, chutih laiin kan hman thiam loh chuan min ṭhen darh vektu pawh a ni thei hle ang. Hmânah, kum 1856 daih tawhah khan he hla hi phuah a ni a:

 

Buanhmun pai ang pawm tawh hnu,

Chêngte-ah lam ang let e;                                                                           

Lalpuithang lem a.¹

 

He hla tlar thum lek hian Vuttaia leh Lalpuithanga te inkârah unau hmêlhai thlenin Mizo History-a chhim leh hmar Indo rapthlâk tak a lo chhuak a, he hlain thisen a ei hnemzia leh a ren lohzia mai chuh… Heti hian K.Zawla’n a ziak, “Khawnglung tlangvalin thawh in hai alawm le, tho rawh u,” tiin. “Thingnawi telin an zu vawm ta a, a tho hmasa apiang chu an kâp let tawp tawp zel mai si a, khawlai chu mitthi ruangin a khat nulh mai a, thisen lah chu a luang nasa khawp mai’’ tiin.²

 

Ṭum khat chu, Chhinlung Israel People Convention (CIPC) hotupa Pu Lalchhanhima Sailo (RIP) ten United Nation High Commissioner for Refugee (UNHCR) an dawr dawn ṭuma an mi hmuh duh an nghah laiin secretary nen an titi a. Secretary chuan India-ah lungawi taka awm mai tur leh India mi vek kan nih thuin Pu Chhana chu a thlem vêl a. Pu Chhana chuan hetiang hian a chhang a, “India chuan a mite chu chiang takin a sawiin a humhalh a. An hnam hla ‘Jana Gana Mana’-ah hian India hnam hla a nih angin India mite chu an kim vek a ni. Keini khawi laiah nge kan lan ve?’’ tia a chhan hnuin secretary chuan, “He  hla hian India a tidarh ngei dawn a nih hi.  Bihar-ah pawh La loo Prasad chuan, ‘India kan ni lo, an hnam hlaah pawh Bihar kan tel lo’ a ti a, tihngaihna an hre lo a ti,’’ tiin a sawi an ti.³ India hnam hla hian INDIA hi a vawng him zel ang nge, a ṭhen darh zâwk dâwn tih chu hunin a la hril ang chu. Helaia ka sawi duh  chu,‘Jana Gana Mana’-ah hian India rama cheng hnamte hi  kan lungawi kim lo a, he hla hian hnam ṭhenkhatte rilru a hliam a ni tih hi a ni.

 

Aw le, tunah chuan kan thupui ‘Zo hnahthlâk inpumkhatna hla ṭhenkhat’ tih lamah kan lût tak tak tawh ang.

Mi pakhat Zo hnahthlâk insuih khawm lehna buaipui em em, a thisen zungzamte’n hna an thawh tawp thlenga mangphana vahvaihpuitu a awm a, a hming chu Capt.L.Z. Sailo a ni. A mangphan ram Zo hnahthlâk insuih khawm hun chu a hmu phâk ve dawn lo a ni tih a hriatna chuan a tha a tiṭhum chuang lo a. A vei em em Zo hnahthlâk insuih khâwm lehna chu a chakna leh hriatna zawng zawng sawm khâwma vahvaihpuiin hril chiam chiam ṭhin mah se,  a chakna leh theihna te chuan eng tik niah emaw chuan a peih lohsan dawn a ni tih hre rengin, a chakna leh theihna te a bo hnu, a hringnun ngei pawhin a peih lohsan hun pawha tha thlah lo a a mangphan ram hril zel turin ‘hla’ ngei chu a lo thlang a. Chu a hla chu hei hi a ni.

 

Unaute u, in dam tlang alawm maw?

Rinawmna chibai in dawng thei em? 

Chhinlung chhungkhat Zoram chheh vela mite,                         

Insuih khâwm leh zai i rel ang u.

 

Aw ṭhang leh tharte’n eng nge kan tih ang le?

Kan chanvo kan bil neihna kawng chu;

Thawk chhuak turin eng nge kan tih tâk ang le?

Insuih khawm leh zai i rêl ang u.

 

Unaute u, han dâwn nawn ve teh u,

Khawvel unau hnam dang hriattir zelin;

Kan nihna chung Pathian lo ruatsa ang khan,

Insuih khawm leh zai i rêl ang u.

 

Unaute u,in dam tlang alawm maw?

Rinawmna chibai in buk ang le;

Chhinlung chhungkhat Zofa kan nih hre rengin,

Insuih khâwm leh zai i rel ang u.4

 

He hla hian Zofa hnahthlâk Chhinlung chhuakte insuih khawm lehna kawngah meichher chhiin, a hun lai phei chuan a meichher chhit chu a eng hle nghe nghe a ni. Zofate zingah hian he hla hre lo hi kan awm awm lo ve. He a meichher chhit hian Zofate thinlungah insuih khâwm lehna mei chu dep kai zelin, kan thinlung hi insuih khâwm leh duhna meiin a kang ral mêk zel a nih hi.

 

Hman kum deuh mai khan, Manipur-a Zo hnahthlâkte inkârah inhriat thiam lohna thlengin unau chengrâng chawi meuhin an insual chiam mai a, nunau an mangang a, thisen a chhuak a, an hmangaih an tlangvalte an chan a, an unaute lakah an ralmuang lo a, thin thiin an mu ngam lo a, an inhriat thiam lohna chuan reh lam aiin zual lam a pan zel si, mittui nen kan unaute an awm a ni tih Zoramin a hriat chuan Zoram hi a rilru a na a, an inkârah ban phar a ngai a ni tih hriain ban a phar ta a. Hla hmangin Lalmuanawma Mathipi chuan hetiang hian a han au zui a, unau hmel inhaite buaina pawh chu a lo reh ta a nih kha.

 

Hmelma ianga doral lo lian,

Thisen chhuak vanga nunau mangang; 

Authawm chuan pa chan chang Zoram,

Lairil zawng chu a fan chhuak a;

Chhul khat chhuak unaute inhai chu,

Zoram thin a na ngei e.

 

Unau kan indoin tu nge ding chhuak thei ang,

Suihlungrual ten insuih khâwm ila;

Chutin khuavel kan chhing ngei ang.

 

Hla hmanga inpumkhatna au chhuahpui hi a sawt hle reng a ni. Hla hian thinlung, lung anga sak pawh a chhu keh sawm vek thei a ni. Hla hi Wordsworth-a’n “Poetry is the Spontaneous Overflow of powerful feelings’’ 5 a tih angin hla chu rilru chhungrila khat liam, dan rual lohva luang chhuak a nih avangin a mi deh hi a na a, a ṭha zawng leh ṭha lo zawngah pawh a nghawng hi a na hma hle a ni. Hla vha chuan thinlung hi a fan raih bik tlat ṭhin. Chuvangin, Zofate inpumkhatna hla ṭha tak tak hi la piang zel se a ṭha hle mai. Zofate hi ram hrang hrangah ṭhen darh ni mah ila, kan thu leh hlate hian nghet takin min phuar khâwm zel sela, literature hmanga kan inzawmna hi chu he khawvel ramri te hian daidan ve theih a ni lo. Muantea bawk hian hei hi chiang takin a sawi:

 

Hringnun kan chhiar Zofa lengte’n,Kan ram leh hnam tan sir kan sâwn e;Daidanna piah ramah chuanin,

Unaute chu kan intâwk a;Kut insuihin zai lai kan vawr za,

Nghilh thei hian kan mawi nem maw, tiin.

 

Ani hla hian ramri kham te chu a thlawh khûm a, he huang aṭang hi chuan ramriin awmzia a nei lo a, daidannain a dang thei hek lo, tan in te chuan awmzia reng reng a nei ve lo. He khawvel dan leh hrai zawng zawng te hi mênah thlâkin a duhna lam hawiin a kal mai a, saipui kal lai bauh din rual loh ang maiin daidanna bangte chu a su chim hem hem mai a ni.

 

Hla hi chi hrang tam tak a awm a, chung zingah chuan Ram leh hnam hmangaihna hla hian thinlung a khawih dan hi a dang bik ṭhin. Chuvangin, hetiang lam hla hi ngaih nep theih a ni lo a, miin a ram leh a hnam a hmangaih lo a, a ngaihsak loh chuan a tan khawvelah hian dinchhuahna hmun tur a nei lo ang.  Zo hnahthlâkte insuih khawm lehna hian kan Politics mualah duh angin hmun a chang tam lo a, kan social life hian chu lam chu a hawi lo hle bawkin a lang.  Literature mualah erawh chuan hmun pawimawh a luah chho mek zel dawnin a lang a, tun aia kan uar zual zel hi a pawimawh khawp mai. Kan insuih khawm a, zai khata kan luan za hun hi a nghahhlelhawm hle mai.  Chu hun thlentir tur chuan keini Mizorama chengte hi kan pawimawh tak zet a ni.

 

Dawn chiang ila leng zawng hian,

Kan hnam leh kan ram ti mawitu;

Lusei, Hmar, Paite, Kuki, Mara leh Lai,

Chhulkhat kual Chun khat hrin kan lo ni e.

 

He hla ka ngaihthlak chang hian insuih khawma zai khata Zo hnahthlâkte kan luan za hun a nghahhlelhawm zual ṭhinin ka hria. Mizoram chhunga chengte zingah ngei pawh hian Politics avang te, Economics Development rual loh avang te, mi ṭhenkhat khawhawi zim luat avang tein innghirnghona a chhuah chang a awm fo mai, unau hmel kan inhai lek lek ṭhin hi a pawi tak zet a ni. Heng hla te avang chauh hian unau kan nih hi kan hre thar leh ṭhin a nih hi.  Mizoram-a chengte hi kan chhehvela kan unaute tan ‘Inpui nghâktu’ kan nih kan inhriat chian a ngai hle a ni. He ram ngei hi Zo hnahthlâk chi hrang hrangte zalen tak leh thlamuang taka kan lenna hmun, kan neih chhun chu a ni si a.

Parah chang i, ramloh lentu parmawia’n,

 

Thangngo ṭum kawng bellei mualah ṭo ila;

Min thliak dah law maw e nau lawma’n.6

 

He hla hi Lalawithangpa hla a ni a, James Dokhuma’n he hla avang hian Awithangpa hi”Hmangaihna sawi tel miah lo a hmangaihna sawi fiah thiam ber a ni e’’ a tih phah a.  A ni, he hla tawi te-ah hian hmangaihna sawi tel lo mah se, a hmangaih Thangngovi làwmna tur a nih dawn phawt chuan a thliah atan pangpara chan pawh a huam hial mai hian a hmangaihzia chu a hril chiang a ni.

 

Hon hilhin, hon gelhin,

Bang ziakin a, ziakin a?

Min hrilh ve la, eng vang nge maw,

Suihlung i her tak le?(Zirsangzela Hnamte) 

 

leh

 

Dar ang tawn leh ni tur, 

Ka dâwn vel mittui nen;

I hlimthla mai maw ka chan,

Ka ngai thiam nem maw;

Maphasy, maphasy, maphasy.(Runrosiama (Vulmawi))

 

He hla pahnihte hian Zo hnahthlâkte inpumkhatna lam an sawi lo, insuih khawm pawimawhzia lah an sawi hek lo, an veizia an sawi bawk lo. An lungduhte’n ṭhen nan biahthu an hlan avanga an lungleng leh khawharin, ‘Eng vang nge maw min bansan tak mai le?’  an tihna leh he khawvel hmun nghet loah hian lungduhte inṭhen a ngaih leh ṭhin avanga inhmangaih takte’n mangṭha ti chunga an inṭhen hrehawm an tihzia thu an sawi mai zawng a ni.  Mahse, heng hlate hian min phuar khawm tlat si a nih hi. A ni, Zo hnahthlâk ṭawng hrang hrang te hi kan hla thuah hian a tam thei ang bera kan khung khawm hi a ngai ani.  Zo hnahthlâk ṭawng hrang hrang te kan inhriatsaka kan inhmansak hian kan inunauna hi a tinghet leh zual sauh dawn si a.

 

Hla pakhat kan sawi tel loh theih loh a awm a, hmanah tawh khan Aizawl-ah Beat Contest-a lo tel ve tumin khawchhak kan unaute chu Zodi hming invuahin hming an pe ve a; mahse, hotute’n “Nangni zawng Mizo in ni ve lo ve, Kawlram mi in ni,’’ 7 tiin lu thinsanin sirah an lo hnawl tlat mai a.  Rilru na takin an haw chho a, chu an rilru natna chu tihian hlain an rawn hril chhuak ta:

 

Mahse, lenna vangkhua fan leh ni chuan,

I chhunga lungduh naufa leng zawngte’n;

“Khawchhak mi’’ tia hming min selin,

Sirah dam ten puan ang min hnawl e. tiin.

 

He hla Zoramin a hriat ni chuan inchhir leh rilru hrehawm takin a awm a, a chang tawp ber he hla an phuah chhan ber han hriat phei hi chuan inchhir lohna rual a ni lo.

 

Ram tin kil tina Zofate zawng hian,

Suihlung ruala thinlung hmunkhat puin;

Hmangaihnaa insuih khâwm zel hi,

Kei ka lungkham leh duhaisam a ni.8 (T.Zorampela)

 

Thinrimna hi thinrimna veka thungrulh ai chuan thuhnuairawlh leh inngaihtlàwmna nena chhan let hian thinlung a hneh zâwk ṭhin.  Kan unaute hian an chunga thil kan tih sual hi thinrimna tel hauh loa thuhnuairawlh leh inngaitlawm taka an duhthusam ber chu Zo hnahthlâkte hmangaihna nen insuih khawm hi a nih thu an han hril meuh chuan, sira hnawl hnu aiin a hnawltute hi kan na fe zawk a ni lo’m ni.  Kan nat dan chu Zikpuii Pa hian a sawi thiam ber mai, “Hla mawi tak maiin min han deng zui a, ngaihthlak pah hian kan hnukulh insum hi chil kan lem ri khalh khalh mai a ni. Vaiho pawhin an hriain ‘He hla in ngaihthlak apiang hian Mizoho hi eng a ti nge maw in ngawih leh ṭhuap ṭhin le?’ te an ti mai mai a”9  tiin. He hla hian kan unaute kan hai a ni tih min hriatir a, chutiang chu a thlen tawh loh nan rilru inseh ruh chungin insuih khâwm leh zai i rel ang u, tih min chang thlantir a, nghet takin min suih khawm a ni.

 

Nimahsela, hun hian kan thil hriatte leh lo vei em emte pawh hi a liampui a, kan hre reng tawh ṭhin lo a ni ang. Mi sual pakhatin Aizawl-ah hmeichhe naupang duhawm tak hlim taka a leng lai chu a tisa chakna chhuanlam ringawtin a pawngsual a, a rapthlâk ngawt mai, a thinrimthlakzia hi sawi mai hian a hrilhfiah zo lo.  Mipui thinrim chuan chu mi sual chu a phu ang ngeia dan anga hrem mai chu duh tawk lovin, amah kha khawchhak kan unaute zinga mi a nih avang maiin khawchhak kan unaute chu zanlai pawh sawi lovin Zofate Jerusalem Zawlkhawpui aṭang hian kan um chhuak  ta chum chum mai a ni. Chu mai chu a ni lo, a hnu deuhah pawh an chenna IN te halsakin hman kum deuh lawk thleng khan Zoram hi in chhuahsan tur a ni tiin vaukhanna chi hrang hrang nen kan la um chhuak mek reng a nih kha.  Anniho hi hnam dang an ni lo, kan mikhualte pawh an ni lo, kan unaute ngei an ni asin.  Zo hnahthlâk kan unaute hi Zoramah hian an len loh chang hi a va tam tak em, kan unaute chunga kan thil tih hi a dik tawk lo hlein ka hre ṭhin.

 

Khawchhak kan unaute hi an ram rorelna ṭhat loh avangin khawvel hmun hrang hrangah vakvaiin an awm mek a, Mizoram-ah ngei pawh hian mi tam tak an awm a ni. Harsatna chi tin rengin a nuai vel, mahni in leh lo pawh luah lum thei loa khawsa zingah chuan mi sual deuh thil sual tia kawhmawh lo bawl deuhte zawng an awm ngei ang. Chung mite chu dan anga an chunga rorel hi a tawk mai lo em ni? Heng mi sual ṭhenkhatte vang hian unau kan nih hi i theihnghilh lo ang u. An chunga kan thil tih ṭhenkhatte vang hian kan inunauna hi hliamin a awm ṭhin a ni.  Khawvel hmun ṭhenkhatah chuan enkawlna ṭha tak te pawh an dawng zawk asin! Zoram, anmahni ngei pawhin an Inpui nia an ngaihah hian kan cheksawlh nasa mah mah em? Tunlai hian an ram rorelna pawh a lo ṭha chhoin anmahni ram lamah hian mi tam tak an kir leh mek tawh a, a lawmawm em em a ni. Pi leh pu chenna kan ram khi chhuahsan vek loa luah chhunzawm zel hi a pawimawh tak zet a ni.

 

Zo hnahthlâk te min suih khawmtu hla ṭha tak tak hi tam tak a awm ang, chungte chu tunah hian kan sawi vek sêng lo ang. A tawp ber atan chuan hla hmang hian insuih khawm lehna thu hi au chhuahpui zel ila, kan ṭhahnem ngaihna chuan rah a la chhuah ngei ang.  Zofa hnahthlakte din chhuah nan he hla hmang hian kan thu i ti tawp teh ang.

 

Unau hmel inhai tawh lovin,

Insuih khâwm leh zai rel ila;

Chhinlung chhuak Zofa hnahthlak zaleng zawngte,

Zai khatah siktui ang luang zawk ang u.(Chun khat hrin)

                              

 

Zawla K.  Mizo Pi Pute leh An Thlahte Chanchin. 1993. p 106.

Ibid.   p. 109

Lala F.  CIPC Dairy-2002.P-134.

LZ.Sailo, Capt.  Insuih Khâwm leh Zai I Rel Ang U. 2008. p 34.

Ranghukul Tilak Dr.  History and Principles of Literary Criticism. 1999. p 253.

Vanlawma R.  Awithangpa -1989. p 197.

Darhmingthangi(Zikpuii Nu).  Zikpuii Pa HnuHma. 2000. p 206.

Ibid. p 207.

Ibid. p 206.

 

References:

Darhmingthangi.  Zikpuii Pa Hnuhma. 2000.

Govt. Hrangbana College Aizawl. Pi Pu Zun Zam. 2008.

Lala, F. CIPC Mizoram Dairy. 2002.

Lalthangliana, B. Ka lungkham. 1999.

Khiangte, Laltluangliana. Mizo Thuziak Thlan Chhuahte. 2001.

Lengzem.  Dec., 2013.

LZ.Sailo Capt. Insuih Khâwm leh Zai I Rel Ang U. 2008.

Raghukul Tilak Dr.   History and Principles of Literary Criticism. 1999

Siamkima. Zalenna Ram. 1992.

Thu leh Hla. Dec., 2013 – Bu 371-na.

Vanlawma R.  Awithangpa. 1989.

Zawla K.  Mizo Pi Pute leh An Thlahte Chanchin. 1993.

 

Cite the original source: 
Zonunthara, HC. “Zo Hnahthlâk Min Tipumkhattu Hla Ṭhenkhat.” Mizo Studies, IX, no. 1, Mar. 2020, pp. 52–62.