Zikpuii Pa ‘Mawlna’

Kum 1929 December ni 27-a Aizawl Venghluia piang, Hrawva Khiangte leh Lalluii Chhakchhuak te fapa (Vanlallawma 160), Mizo zinga Indian Foreign Service-a inziak tling hmasa ber (1962-ah a inziak tling) leh Writer of the Century (1900-1999) atana an puan (Lalthangliana 123) tak K.C. Lalvunga, Zikpuii Pa tia kan hriat ṭhin hi ‘pa mâwl’ tia sawi tur chu a ni ngai hauh lo ang le. Zikpuii Pa hi a lo mâwl hle mai tih hi tun ṭuma kan sawi tum a ni lo a; a thawnthu pakhat ‘C.C. Coy. No. 27’ leh a thu leh hla ṭhenkhata ‘mâwlna’ chungchâng a sawi dan kan thlir ang a, sâp ngaih sanna salah khan a lo tâng ve reng em ni tih kan en zui thuak bawk ang.

 

‘C.C. Coy. No. 27’ hi a changtupa Râlkâpzauva’n ‘harsatna tam tak leh buaina kâra a taksa leh rilru lo ṭhan chhoh dan (life history) a sawina’ (Lungrualna Tlang 4) thawnthu ngaihnawm tak a ni a. Harsatna leh retheihna tinrêng pal tlanga hlawhtlinna tlâng chhipa a chuan chhuah dan chu amah Râlkâpzauva kâ ngei hmangin Zikpuii Pa hian min hrilh a. Thawnthu ṭha leh zir tlak tak a ni.

 

He thawnthu-ah hian Zikpuii Pa hian Râlkâpzauva chu ‘khi-ah khi-ah, kawlvalenchham, Khawchhak Tuipui ralah, mawlna chhum pui kar’ (9) aṭanga lo zi chhuak niin a sawi a. ‘Mâwlna chhûmpui kâr’ aṭanga lo seilian a nih thu chu duh tawk mai loin, ‘ram mawl takah, mipui mawl tak zingah, nu leh pa mawl tak karah ka lo piang a,’ (9) tiin Râlkâpzauva chu a chanchin a sawitir a. ‘Mâwlna’ tih mai pawh chu duh khawp loin, ‘mawlna leh âtna ram’ a ti leh kher bawk. Heti tak maia Zikpuii Pain a thawnthua a changtupa Râlkâpzauva seilena hmun a sawi ‘mâwl’ chiam mai hi eng vang nge ni ang? ‘C.C. Coy. No. 27’ thawnthua a thu hlawm (paragraph) hmasa berah hian ‘mâwl’ tih leh ‘mâwlna’ tih ringawt hi vawi nga ngawt mai a sawi hman a ni!

 

Hetiang hian Râlkâpzauva hian a seilenna hmun, Khawchhak Tuipui ral chu ‘mawlna chhumpui’ zin hnan, ‘thim leh êng’ inṭhenna ram niin a sawi a, ‘Mizoramah, chutah pawh bial hnufual ber’ a nih thu a sawi bawk. A mi chêngte pawh mâwl tak anga sawiin, a nu leh pa meuh pawh an mâwlzia a sawi bâng lo. A ram nawmzia leh mipui hlim theihzia te, an titi ngaihnawm pui pui a han sawi châng pawhin, an mâwlna bawk chu a zep tel hrâm ṭhin a. A ṭhenrual ṭhate nen an inṭhen ni-ah pawh, a tana an ṭhatzia sawi pahin, “Zoram ka hmangaihna leh ka ngainatna chu ka ṭhenrual mâwl tak takte hmelah chuan ka hmu a,” (23) tiin a ṭhenrualte ‘mâwlna’ bawk chu a sawi tel leh. An khua leh an khawvel chu chhuang lo takin ‘mâwlna khurpui’ tiin a sawi a; a pa chu ‘thingtlang pa mawl’ a nih thu a sawi fo a, ‘khawchhak pa fatumbua nena inphur leh ringawt ṭhin’ a pa tana sum a vânzia chu uar takin a sawi ṭhin. A nu pawh a zuah chuang lo a. An khaw mipuiten a Shillong awm tur an lo thlaha, pawisa nawi ilo an rawn pek khawmte chu lawm hle mah se, “Mizo nu mawl tan chuan lawmthu han sawi tak ngial pawh a harsa a,” (22) tiin a nu chu ‘mâwl’ avanga lawmthu sawi harsat angin a sawi bawk! A nu ‘mâwl’ vang nge a zahzum ve hrim hrim vang tih hi ngaihtuah tham tak a ni.

 

Râlkâpzauva hian ‘ka zahpui e’ ti dawt lo mah se, “Khawchhak Tuipui rala piang nih zet chu a pawizia chumi ni aṭang chuan ka hre chhuak chiang lehzual a ni,” (15) tiin a pianna hmun chu a sit hle a ni tih kan hmu. Mahni seilenna ram, mipui leh mahni nu leh pa thlenga ‘mâwl’ tih tak chiam chiam mai hi eng dan nge ni ang le?!

 

Hetiang taka Râlkâpzauva’n a seilenna ram leh mipuite ‘mâwl’ a tih chhan hi hnam dang (a bik takin sâp) aṭanga a teh vang niin a lang a. He thawnthu ziaktu Zikpuii Pain sâp a ngaih sanna pawh kan hmu thei riai ruai a ni. Chu chu Râlkâpzauva leh a pa inbiakna hian a tichiang viau awm e.

 

Râlkâpzauva : Ka pa, babu nge lal zawk ang sap?

A pa : Sap le.

Râlkâpzauva : Ka pa, sap a nih ve theih em?

A pa : Ka hre lo le!

Râlkâpzauva : A nih leh ka pa, mihâng sapa ṭang an awm em?

A pa : Awm pawh an awm ang, mahse chutiang chu ka la hmu lo.

Râlkâpzauva : A nih ka pa, babu chu a nih ve theih ang em?

A pa : Theih pawh a theih mai theih a ni. Lehkha han zir phawt la, a theih leh theih loh chu, Pathian thu thu a ni ang chu. (14)

 

Râlkâpzauva pa chuan ‘Sap nih ve ngaihna chu a hre lo va, babu nih erawh chu Pathian khawngaihnain a theih a ring a, sap ni tur erawh chuan Pathian khawngaihna pawhin a tlin meuh dawn lo niin a ring ni tur a ni’. (14) Heta ‘sâp’ an sawi hi ‘mingo’ (British) a ni kher lo thei a; a enga pawh chu ni se, Râlkâpzauva te pafain sâp nihna an dah chungnunzia chu a lang chiang hle a, Pathian khawngaihna nen meuh pawh tlin dawnin an inring lo a ni.

 

Râlkâpzauva hian sâpho hi a tluk ve thei tho tih a lantir a, chu lai chu Zikpuii Pain Mizote a vawrh san lai ber pawh a ni ngei mai. Chutih rual chuan, ‘sapho hi ngaihsanna tak ka nei’ tia an ruaiṭheh nia Mizo mipuite chaw ei ang ei a, mak ti leh deuhsawh hmel an put loh avang maia a lo ngai sang a, ‘hnam fing hi an lo mak hle mai’ (70) a han ti chiam hi chu a ho angreng. Mizote paw’n hnam dang chaw hi eiin in ve ta ila, tui ti vak lo chung pawhin a mawiah tal tui tih hmel takin kan lang ve fo thoin a rinawm.

 

Râlkâpzauva’n an khaw mipui leh a lo chawr chhuahna ram ‘mâwl’ a ti lutuk ṭhin leh, a pa aṭang tawha sâpho an dah sanna rilru lo lang leh ṭhin kha eng vang nge ni ang? Zikpuii Pa sâp ngaih sanna rilru, a thawnthua lo lang chhuak ta a ni thei mai ang em?

 

Zikpuii Pa hian a pâwng a puiin sâp a ngai sâng chu kan ti ngawt thei lo ang. A thuziak hrang hrang kan enin Sâpho rorèl fuh tawk lo leh an dik lohna han thai lan châng pawh a nei ve tho mai. A thuziak hrang hrangah Mizote a dah sanna, a ṭanna leh hmangaihna, a tawi zawngin a Mizona rilru kan hmu. Amaherawhchu, a thuziak pakhat ‘A ruh no no chhuakah’ tih a, “Indopui II-naa hnehtu chan changtu ber pawh ṭangho zinga a chau ber British kha niin ka hria,” (Zikpuii Pa Hnuhma 45) tia ‘hnehtu chu British chauh a ni’ a lo tihah khan a sâp (British) ngaih sanna rilru chu a thup zo lo niin a lang. A dik a dik chuan America leh Russia sipaite kha awm lo se, an Kumpinu (British) sawrkar khan chaurau ek a thai ngeiin a rinawm.

 

A hla lam kan en pawhin ngaihbel tur ting chuan sâp ngaih sanna hnuhma kan hmu. A hla pakhat ‘Sikni eng’ tihah chuan thlasik zîng ni chhuak mawizia chu thiam takin a hla hmangin a puang chhuak a. Chu thlasik zîng ni chhuak êng mawi tak mai chu ‘tleitir sakhmêl’ pawhin a cho zawh loh thu a sawi hial a, a fak thiam hle. Tichuan,

 

“Sappui thil tih tuahrem thiam pawh hian,

Nang anga rawng mawi an bàn ngai lo,” (Zozam Par 115)

 

tiin a au chhuak ta a ni. Hei hi kan hrilh fiah dan azirin ngaih dan dang te pawh a awm thei tho ang a. Ngun taka kan chhiar chuan, ‘Sappui thil tih tuahrem thiam’ tih hian sâpho a dah sanna chu a hril tel niin a lang. Sâp an nih tak avanga ‘pui’ tih zui kher duhna te hi eng nge a chhan ni ang tih hi ngaihtuah tham tak a ni. A hla dang pakhatah pawh, “Anka biak theih chang la sappui iangin,” (91) tih kan hmu bawk. Hei hi R.L. Thanmawia chuan, “A pian leh mûrna boruakin thui tak chu a thil thlir dân (imagery) a hruai,” (Chuailo I, 190) niin a ngai a ni.

 

Eng pawh ni se, Zikpuii Pa khan sâp a lo ngai sang ta deuh a ni paw’n thil pawi ber a ni lo a. A thawnthu leh thuziak ṭhenkhata Mizote ‘mâwlna’ a sawi duhthawh ta deuh leh a hmu ‘mâwl’ ta mah mah kha kan helh deuh ber leh chhiar nawn ngai kan tih chu a ni. J.F. Laldailova’n Zosapthara a ‘hmuh ṭhelh’ dan a ziak te kha a ngaihnawm mai bakah a zira zir tham a ni a. Zosapthara thlavang pawh a hauh thiam narawh, a pawi lo e. Zosapho hnathawh a fak pawh kan hre thiam zel thei ang. “Hmanlaiin Mizovin hawrawp kan la neih loh avangin, a dik chiah chuan kan pi leh pute thawnthu leh hlate kha literature tia vuah theih an ni mang lo,” (Zikpuii Pa Hnuhma 157) a lo tih te pawh hi hriat thiam dan dan a la awm. Mahse, Zosapthara thlavang hauh a tum lutuk vang emaw, Mizoten hawrawp kan la neih loh vang emaw, a eng vang pawh ni se, ‘hnam â sa…leh mawlna rilru chiang lo’ (157) tia Mizo pi pute a sawi zui kher kha chu en liam mai a har ta a ni.

 

Mizo pi pute thufing leh serh leh sang fing tak tak kan inzirtir lauh lauh lai a, kan hmuipuipû ber Zikpuii Pain ‘pi leh pute thurin mawl tak’ (158) a lo ti kawkalh leh hlauh mai hi chu chhiar thiam har tak a ni. C. Lalawmpuia Vanchiau chuan a thuziak pakhat ‘JF-a Bible Thlirna: Zikpuii Pa a ṭawngvai em ni?’ tihah chuan na khel khawl takin heti hian a ziak, “Pipute ‘hnam a saah leh mawlna rilru chiang lo’ pu a ngaitu thinlung chu, Sap ngaihsanna rilru aṭanga chhuak a ni loh chuan, chhuahna tur dang a awm chuang lo. Min thlahtute mawl titu chu, tupawh ni rawh se, mawl tih a ngah khawp ang,” tiin (Vanchiau 24).

 

‘Mâwl leh mâwl loh’ hi engtia teh tur nge tih chu chhan thiam har tak a ni ngei ang. Mi tam tak hi chuan kan hriat ang hre ve lote hi ‘mâwl’ kan ti mai ṭhin niin a lang. Khawvel thiamna, finna leh hriatna vârpawh tura ke kan penna kawngah hian, mahni nihna leh thlahtute hmusit tawk lek hian kan ‘fing’ em tih te, kan chawr chhuahna ram leh khua zahpui tawk lek hian kan khawhawi kan tizau em tih leh, mahni nu leh pate ‘mâwl’ ti tawk vel hian kan inzir sil ve ringawt em tih te hi kan ngaihtuah fo a ngai a ni.

 

Zikpuii Pa hmathlir leh Mizote tâna a rualawhna hrang hrang hi hmuh hmaih rual a ni lo a, a Mizona rilru mawi tak te hi sawi fê tham a awm ngei ang. Chutih rual chuan, Mizo pi pute ‘hnam â sa…leh mawlna rilru chiang lo’ anga a ziak duh mai leh, ‘C.C. Coy. No. 27’ thawnthua Râlkapzauva, a pian leh seilenna ram hmusit leh en hniam ang ziazânga ‘ram mawl takah, mipui mawl tak zingah, nu leh pa mawl tak kar’ aṭanga lo zi chhuak anga a sawi hi chu chhiar liam mai a har hle a ni. Chu ‘mâwlna’ chungchang chu a ni ‘Zikpuii Pa mâwlna’ kan tih tâk ber chu.

 

 

Lalthangliana, B. “Thutluang (Prose)”. History of Mizo Literature. Department of Mizo, Mizoram University. First Edition : 2013.

Thanmawia, R.L. Chuailo Bu 1-na. Gilzom Offset. Second print : 2011.

Vanchiau, C. Lalawmpuia. “JF-a ‘Bible Thlirna’: Zikpuii Pa a ṭawngvai em ni?”. Zolife. July 2010 : 20-25.

Vanlallawma, C. Mizo Hnam Puipate. M.C. Lalrinthanga. First Edition : 1994.

Zikpuii Pa, Lungrualna Tlang. MCL Publications. Second Edition : 1999.

– – -. Zozam Par.  MCL Publications. Second Edition : 1999.

– – -. Zikpuii Pa Hnuhmâ (A Collection of Zikpuii Pa Essays). MCL Publications. Second Edition : 2000.

 

Cite the original source: 
Lalawmpuia, H. “Zikpuii Pa Mawlna.” Mizo Studies, IX, no. 1, Mar. 2020, pp. 44–51.