Abstract : Hun kal zel rual hian ṭawng a danglam zel a ni tih chu hai rual a ni lo. Chutiang bawkin Mizo hlaruate pawh a inlumlet chho ve zel a, tunlai hla thlir hian hmanlai Mizo hlaruate kha a bo pil tial tial ta em ni tih hi ngaihtuah tham tak a ni a. Hmanlai aṭanga kan inhlan chhawn zel Mizo hlaruate’n hman a hlawh loh telh telh chhan hi hnam dang thu leh hla kan hmelhriat avang te, hla phuah chhan thar a lo pian zel tak vang te, ṭawng ṭhan zelna vang te leh khawvel hmasawnnain a ken tel nunphung thar vangte niin a lang a ni.
Hlarua Awmzia
Hlarua tih hian a huam zau thei hle a. R.L. Thanmawia chuan,
Hla thu leh hla ṭawng bik a awm chuang lo ti sa teh mah ila a awm miau si a, hla thu hlangin hla a siam hleih theih lawi bawk si lo va. Hla thu hi thu pangngai aṭangin la hrang dawn ila thu aṭanga hla thu changte an nih vek bâkah, hla thua kan hman tam tak hi hun hmaa ṭawng tuallengte kha an ni a. Hla thu hi thu-chingal a ni ber âwm e. Tuisik pangngai kha chingal-thlawrbûra vut a kal tlang hnu chuan a al tawh a; tui chu la ni reng mah se tui kan ti tawh lo va, thlawr loh tui nen chuan a inang thei tawh hek lo. Chuvangin vawng tualleng ni ṭhin kha thlawr a nih hnu chuan hla thu a chang ṭhin. A hmangtuin a thiam phei chuan a hun laia ṭawng tualleng ngei pawh hla thu mawi takah a chang thei a ni’
tiin a lo hrilhfiah a ni (Hla thu dictionary 13).
Hla phuahtute’n an thil vei leh sawi chhuah duhte tlang taka an puan chhuah laiin ṭhenkhat erawhin thup takin thil dang nena suih rem tein an zem kual a, chung aṭang chuan poetic technique kan tih, simile, metaphor, symbol, allusion leh a dang tam tak a lo chhuak ta a. Chung zinga Mizote hlarua langsar leh hman tam ber nia lang chu tehkhinna simile leh metaphor te hi an ni a tih theih. Tehkhinna hmang hian hmuh ngai loh leh hriat ngai lohte hmua hriain hmeh bel nan an hmang chho ta zel a, hlarua a pun nasat phah hle.
Mizote hla thu tam tak hi thu pangngai hma lama thu dang belhin emaw a hnung lama belhin emaw-in hla thu-ah a chang ṭhin a. A hma lama thu dang belha hla thu chang ta hi thil hming (noun) deuh vek an ni a Ar – bawhar, Ban – chawnban, Fur – khuafur tih te leh, lam dan thlak thleng te, thu pangngai lam kim loh te, lan dan leh nih dan anga sawi leh kawng hrang hrang hmangin hlarua tam tak te hi a rawn piang a ni.
Hla phuah nana hlarua hman uar tak loh chhan ni-a lang hrang hrang te lo chhui zau ila –
Hnam Dang Literature Kan Hmelhriat Vangin:
Mizote’n inawih tlei nana an lunglen zawng leh vei zawngte eng dang mah ngai lova Mizo hla thu hmanga an inpuan chhuah ṭhinna chu kum 1894-a Kristian missionary an lo luh chuan nêk sawrin a awm ta a. Mizote chu zu hmun sa hmuna zai ṭhin kan nih vang nge ni, hla sakna hmanrua khuang chenin an hnâwl a. Kristian sakhua chuan Mizote a chiah hneh hle bawk avangin Mizo zai leh hlarua chuan ngaihsak a hlawh lo tial tial a ni a tih theih awm e.
Sap missionary-te chuan Mizote chu kristian thu leh hla min hmelhriattir a. Pi leh pute nuna dawi hla te, sakhaw biakna hla te chu a taka hman leh tura kaih thawh zawh rual lohin sakhaw thar chuan a chhilh bo nghal a ni. Zosap missionary-te chuan kristian hla Mizo ṭawngin an phuah a, an letling bawk a. Chu’ng Mizo kristian hla neih hmasakahte chuan Mizote’n hlathu bik kan neihte chu hmuh tur a awm lo va. Prof Darchhawna chuan, “Mizo Zai pangngai kha khawvel Zai an ni ta vek a, Kristiante tan hmelma lian tak an ni ta. Do hla an chang a, an tana hla thar, ki thara sak tur, an tui emaw tui lo emaw, an thiam emaw thiam lo emaw an zir a ngai; chu chu tihmakmawh a ni,” (Lenchawm, 29) tiin a ziak a. Sakhaw thar hlate chu Mizo hlarua tel lova ṭawng tluang pangngai hmanga an siam leh phuah a nih hlawm avangin Mizo hla phuah thiamte ngei pawhin an zui ta a. Tunlai thlengin Kristian hlaah chuan Mizo hlarua hmuh tur a awm meuh lo a ni ti ila a sual awm lo ve. Heng Mizo ṭawnga kristian hla kan neih hmasak, hnam dangin min siamsak hlate hi pi leh pute’n hlaruaa an lo phuah ṭhin hla fîr, pawlh dal loh aṭanga pên sawnna leh khaw dang an hawina hmasa ber a ni.
Amaherawhchu, Mizo hlaruate chu pawlh dal lo ni ta mah se a ral hlen mai bik lo va, kristian sakhuain min chim hnuah pawh Puma Zai te chu a lar thar leh a. Kum 1919-ah harhna a lo thlenin Mizo Zai thar tia an sawi Lengkhawm Zai a chhuak leh bawk a. Kum 1950 velah pi pute zai thluka siam Ramthar Zai, kristian hla ni si chu a lar hle a. Hengah hian Zosapte leh kristian hla an hriat ṭhina tel ve lo Mizo hlaruate chu an par vul leh ta a ni. Chhan hrang hrang vanga Mizo hlarua hman ngai tawh loh a awm ṭeuh lai hian vawiin thlengin kan ban phakah a la awm reng ti ila a sual tam lo vang.
Mizo lehkha thiam hmasate kha Mizo thu leh hla lama thawh hlawk tak tak an ni deuh zel a. Pi pute zai leh kristian sakhaw hla chauha inhnangfakna hmu ṭhin khan Lengzem, Lenglawng leh Poetry te kan hmelhriat chho ta a. Lengzem leh lenglawng huanga khung theih chu a hlathu kenah lo nei tawh mah ila, nihphung thar, form thar leh hla tlar rem dan thar te nen Mizote thu leh hla khawvelah seng luh a ni a. Kohhranho sakhaw lam hla ni lova an thikthu a chhiat em em laiin Serkawn concert 1932-1946 chhungin buatsaih a ni a, heta ṭang hian lenglawng hla chuan par a chhuang a, poetry ṭha tak tak a lo piang ta bawk.
Mizo literature huanga poetry kan hmelhriatna hi a la rei lo viau a. Hla pangngai leh thawnthute chu Mizo irawm chhuak ngeiin hmasang aṭanga kan lo neih ve rêng a nih laiin poetry erawh hi chu tunhnua Mizote’n ziak leh chhiar an thiam hnua lehkhathiam hmasate’n an rawn put luh a ni a tih theih. Hrawva hian poem sawm bawr vel a phuah a, kum 1920-24 vela a phuah a ni. “A hmaah pahnih khat lo phuah ve zauh lo awm pawh ni sela, mi dangin a hnung an zui khawpa hriat hlawh emaw, chumi kawng zawhtir khawpa hlahril phuah an awm âwm hriat a ni lo” (Khuanu Leng Chawi Hrawva, 33). Amah hi Mizo zinga BA pass hmasa ber a ni a, a thiamna chuan khawvel literature zau zawk pawhtirin poetry hi Mizo literature huangah a lo làwi lut ve ta niin a lang.
A poem “Mi Ropui” tih chu hlaraw un hmang lova a phuah a ni a,
Pianna thu lam ka chhui lo,
Hming pawh hriat a ngai chuang lo;
Thinlung lam a dik phawt chuan,
Mi ropuiah ka ngai ṭhin
tiin, thu un hmang si lovin thu ril tak pai siin a phuah a, he hla chang khatah pawh hian thu ṭha puak chhuah tur a inphum lian hle.
Thanga (1883-1957) pawhin,
Mizo fate u finna zawng ula
Theihpatawpin bei rawh u,
At leh sual dova’n inbuatsaih ula
In hriamhrei pawh keng rawh u
tiin, Mizo fate fuihna poem hlarua hmang lovin a phuah bawk a. Poetry phuah hmasatuho hian hlarua an bân lo va, an hla tam tak chu hlarua hmangin an la phuah zel a. Amaherawhchu, hlarua hmang kher lovin hla a phuah theih a ni tih Mizo thu leh hlaa min hmelhriattirtu an ni.
Lengzem hla hi hnam dang literature hrin tih atan em chuan thu vuakthlak ngam ni lo mah se hnam dang literature aṭanga kan hmelhriat a tih theih awm e. Lengzem hla phuah hmasatute chu Durra Chawngthu, PS Chawngthu, Vankhama, Lalzova leh mi dangte an ni a. Lengzem hla kan neih hmasak sap hla thlûk hmanga an phuah a ni hlawm a. Heng vang hian hnam dang literature an pawh a zâra lengzem nei kan ni tih loh rual em ni dawn? A thluk, chang bithliah mumal zawka lengzem leh lenglawng hla kan lo neih ve theih takna hian hlarua an hman dan pawh a nghawng lo thei lo niin a lang. Hmanlai pi pu zaia tlar thum leka an sawi duh hnawh khawm ṭhin khan, chang li nga lai neitein an lo phuah ve ta a. Hla phuah dan kalhmang danglam chuan hlarua pawh a khawih che ve a ni tih hai rual a ni lo.
Mizo hlaruaah chuan tehkhin hlathu (simile) hi a tam em em a, hman pawh an hmang uar nangiang mai. Hla phuah dan kalphung tharah hian tehkhin hlathu nena inhnuhhnawk a rem lohna chen a awm ta fo.
Mafaa’n Japanese haiku form-a a poem phuah chang khat hi lo tar lang ila-
bikbona hmun duhawm
êng awm chhun a thim pawha
ruihna hlo duhawm (Chawlhna Tuikam, 121)
han tih te hian Mizo hlarua kalphung pangngaia tehkhinna hla thu hmang kher lovin ṭawngkauchheh ren takin hmehbelna hla thu a hmang zawk a ni.
Tin, lengzem leh lenglawng hla hian hmanlai pi pute zai a kal pelh tak avangin thil thar, nunphung tharina a hrin rilru puthmang tharte chenin hlaah nghawng a nei thei a. Hlathu hlui liam chin a awm a, hlathu chher thar tam tak a piang ve zel bawk a. Hmanlai hlaraw un pui pui hmang vek tawh lo pawhin hlathu thar mawi tak taka chher thar a awm zel a ni.
Poet of the Century-a an thlan hial Rokunga hlaah ngei pawh hian Mizo hlaraw un pui pui a hman lohna a tam em em a, ṭawng tualleng hmangin hla ṭha tak tak a phuah a. H. Laldinmawia chuan, “Rokunga hian ṭawng tualleng hmangin hla a phuah satliah niin a lang lova, hla thu hi ṭawng tualleng hmangin a chhawp chhuak ṭhin a ni zawk,” (Rokunga hla, 2) a ti a ni.
A Thu Ken Danglam Vang
Hnam dang literature tukverhah kan dâk a, English poetry phuah dan zuia form leh rhyme mumal zawk nei thlapa phuah mai bakah a thu kenah te hmasawnna a awm zel a. Kan khaw hawi a zau ang zelin kan thil vei leh sawi a zau a, kan puan chhuahna thumal thlengin hmanlai pi leh pute hlaraw un chauha inkhung khawm lovin thil thar a piang ve zel a ni.
Nunphung tharin ngaihtuahna thar a hring a, thil thar sawi a lo ngai a. Hla thu ken danglam tak avang hian hlarua hman a rem lohna leh theih lohna a awm thei. Naupang pawnto hla ngial pawh hi hmanlai leh tunlai huna a thu ken danglam vang hian a inthlau khawp mai a. Hmanlaia an pawnto hla pakhat lo tar lang ila –
Mim zu thlum thlum,
Pa bak thliar nan a ṭha e;
Dam rei aiin a lawm bîng bîng.
Saiawi thar te Bawmzo râl a len,
Kan than chhum a zing e bum bum bum, dei dei dei!
Inbia ula Ropuii nu, doral tui ang a nem ang.
A nem zo lo sihpui Darkhaia te u,
Mangthawm, pawngpawrawl âwt âwt ti mai rawh
(C. Sangzuala, “Pawnto hla” 5)
tih a ni a, a hla thu ken chu mim zu thlum ṭhat thu leh indo inrun thute pawh a lang a. Tunhnua Nuchhungi Renthleiin naupang pawnto hla a phuah “Zing kan tho” tih chu naupangte’n an ni tin hun hman dan a phuah chhuahna a ni a –
Tui takin chaw te kan ei,
Ziakna leh chhiar tur kengin
Sikul panin kan kal ṭhin”
Hmanlai pawnto hla nen chuan a thuken a danglam ta hle a. An nunphung a danglam nasat tak dan te chu kan tarlan aṭang pawh hian a hriat awm e. Naupangte chuan mahni invawn thianghlim lam ngai pawimawh turin hla phuahtu hian a duh a, he hla changah hian ni tina sikul kal chu naupangte nunphung a ni tih a tar lang. Hmanlaia an nunphung mila hlathu an lo neihte chuan tunlai nun a mil ta vek lo va, tunlai mila hla phuah a ṭul ta a ni a tih theih awm e.
Pahnihnaah chuan pi pute hla phuah dan ziarang langsar tak mai chu an thil tawn te, an hmuh leh hriat, thil thleng hlathu hmanga puan chhuah hi a ni a, hlathu ken ril leh thûk a tam lem lo hle.
Hmuaki Zaia,
“Thingtluruma, Zawlsiala chhuah leh,
Sobal ka chhum, ṭhaltui ang nghâk rawh,” (Mizo Hla Hlui, 228)
tih te hi Thingtluruma leh Zawlsiala a bal chhum hmin hun nghak tura a tihna mai a ni a, ṭawngkam tluanga sawi ṭhan tak kha hlaah a chantir ta a ni. Hetianga hla phuah hi Mizo zai hrang hrangah hmuh tur a tam em em. Tin, lunglenna leh khawharna thu tehkhinna nena zam chhuaha phuah hi tunlai thleng pawhin kan lengzem leh lenglawng hla ziarang pakhat a la ni reng a. Hetianga hla phuah hian Mizo hlarua hman a remchang bik hlein a lang a, hlathu hmanga an sawi tum dah chhuah a nih avangin hlaa chang turin hlarua an mamawh bik a ni.
Tunlai ṭhangthar hlaah erawh chuan thu thukphum ril (philosophy) ngaihhlutna a lang tam hle tawh. Chei mawi tura ṭanpuitu a thluk nei ve lo poetry-ah phei chuan a mawina kengtu lian tak a nih avangin ngaih pawimawh a hlawh zual a ni. Thil thleng ringawt phuah chhuahna chu an kal pelh thawthang tawh avangin hun tawn thar leh thil thleng tharah te, ngaihtuahna tharah chuan hlaraw hlui nena inhmeh lo emaw te a lo awm a. Hmanlaia an sawi ngai loh leh an ngaihtuahna luah phak loh thil an ngaihtuah chhuahna te chuan a puan chhuahna tur ṭawngkauchheh thar an lo mamawh ta niin a lang bawk.
Lalzuahliana’n poetry hmanga mihring nun a puan chhuahna te chu a ril em em a, ṭawng tualleng hmang mah sela a thu ken a ril em avang hian hlarua hmanga phuah hla tam takin an pai ve loh thu a pai thung si a. A thu hman chu ṭawng tualleng pawh ni se a thu ken a ril a, a chheh chhuah dan a mawi chuan hla ṭha tak a lo chhuak thei tho a ni tih a lang thei a ni. Lalzuahliana hian lunglen lam thu leh inngaihzawnna lam hawi a phuahah hlarua a hman ṭhat hle laiin, nun a chîkna hlaah erawh ṭawng tualleng a hmang ber thung a. Hei hi lunglenna lam hlaa hlarua hman a remchan zawk vang a ni thei.
He a hla phuah chang khat lek,
I lemchanna thil ṭha ni-a ngai ṭhintu
I sualnate lâwm taka pawma, lo thukrutu
I ṭhatna aia ‘Sim derna-a lungawi ṭhina i ngaih si chuan
Tuin nge ‘Pathian mi’ ni anga lan der ṭalh tum lo ang a,
Tuin nge Pa, Fapa leh Thlarau au der chiam lo thei ang”
tihah hian hlarua a hmang lo va, a thu ken chu pi leh pute nuna tel ngai lo sakhaw thar leh Mizo nunphung thara thil dik lo awmte a nih tak avang hian Mizo hlarua hmanna tur a awm lo hle niin a lang a, a thu pai erawh a ril hle tho a ni.
Nang mihring, i mihring mihrinna kha thlir la,
Ngaihtha tak a famsan tlak dam chhan i nei em?
Thihna hmaah angkhat a kun za theuh tur hi,
Tu nge inthlei thei?
tiin K. Hminga chuan ṭawngkam tuallengin mihring nun ril takin a lo puang chhuak a, pi pute hunah chuan hetiang hla thu ken hi hmuh tur a vang hle.
Ṭhuamtea Khawlhring chuan, “Hla chu chiang tak leh dik tak, thuchah ken ṭha tak nei a ni tur a ni kher em? Hla chu hla a nihna ang ngei hian no hlep hlep se, chiang lo riai se, a dikna hi awm kher lo se a ṭha zawk niin a lang,” (F. Rokima hlate 5) tiin a ziak a. Amaherawhchu, a no hlep hlep ringawt hi ziah leh phuah vek theih a ni lo. Hlathu ken danglam, hriam hrâka sawi chi te pawh a awm.
Harh r’u, harh r’u, aw hnam huaisente u,
Bei r’u, Bei r’u, hma lam pan zel ula;
Zam s’u, zam s’u, thinlung tihuai rawh u,
Ngai r’u, ngai r’u, chu! Tawtawrawt a ri,
Bei leh ngam ngei turin min au”
ti-a Rokunga’n Zofate a fuihna hlate hi a no hnep hnep lo. Hlathu ken a zirin hlarua nena thleh no hnep theih hla a awm laiin, hlarua rawlh em em pawh rem lohna a awm ve a ni.
Pehhel Lova Lang Tlang Taka Thil Sawi An Duhna Avangin
Hun a kal a, ṭhangthar poet an rawn chhuak zel a, hlarua kan tih te chu zawi zawiin hman tlem a ni tial tial a. Ṭawng tuallenga hla phuah an uar chho ta hle a, naupang chhe ṭawng aṭanga hnam dang ṭawng thlengin an seng lut tel zel a, hla phuah nana tunhma poet-te hla thu hman nen chuan a danglam chho ta viau reng a ni.
Kum 2000 hnu lam aṭanga tun hun kal mek chhiarin poetry bu a chhuak hnem ve ta hle a, heng hla phuah tharah te hian hla phuah nana an hman ber chu ṭawng tualleng kan tih hi a ni fur.
Poet-te chu mi dang be pawptu an nih avangin mi dang an biak pawh nan chuan an ṭawngkam hmante chu a pawimawh hle a. Khawvel a hmanhmawh a, mi tin mai hi kan buai a, chuvang tak chuan hla thu-ah pawh hriat fiah leh man nghal zung zung hi mi nawlpuiin kan duh tawh avang leh hla phuahtute chu mi dang be pawptu an nih avangin hlarua aiin ṭawng tualleng chu an hmang tam lo thei lo va. PS. Chawngthu chuan Min hrilh rawh zaninah ngei tih hlaah chuan,
Engtikah nge maw kei ka lâwm nan reng,
Ka lam hawia ânka nêmin,
Biahthu di dam te’n hlan ve zai rel a,
I lunglen thu min hrilh dâwn le (Nghilh Lohna Par, 30)
tiin inthlahrung leh thukhuh ang reng taka a puan chhuah laiin, Feli Fanai sak Anggu-a phuah “Ti ve mai la” tihah chuan,
Beiseina thlawn min pe tur chuan,
Ka phal thei mawlh lo che,
Ka hmangaih leh duhzia che hrilh nawn i ngai tawh lo,
Min duh chuan ka duh che ti ve mai la
tiin a ruh lang rawtin an puangchhuak ta a. Chu chu mi dangte tan hriat fiah a lo awlsamin mi tam zawk ngaihtuahnaa inhrilh fiah nghal leh ni tina ṭawng tualleng a nih avangin bengah a lut hmain hriat fiah a awlsam em em mai a ni.
Tin, ṭhangtharte khawvela kan chen tawh miau avangin lang tlang taka sawi a, chapo ni hauh si lova mahni indahsanna leh ṭha intih ve tawkna khawvel chu thu leh hlaah pawh a rawn lang ta zel a, “I tan ka tling tawk” han tih te “Ka nghei dawn chuang lo” tih te leh “Liam mai rawh, liam mai rawh” ti te hialin lang tlang tak, mahni indah sang takin hla an phuah chhuak a, chu chu tunlai khawvela ṭhangthar tam tak rilru a nih avangin an ril a lo rem zawk a, chutiang a nih avang chuan hlaruate chu hman a lo rem ta ṭeuh lo a ni.
Inngaihzawnna leh inthlakhlelhna chungchangah pawh thukhuh takin tunhma chuan an sawi ṭhin a. Hun a kal a, ṭhangtharte rilru chu lo huaisen telh telhin poet-te pawhin an thinlunga thu awm te pawh an puang chhuak ngam ta tial tial a, insumkarna nei lovin lang tlang takin an puang chhuak ngam ta a ni. Anita V.L Nunmawii chuan,
Ka taksa te hi i tan
Ka dawn vel ṭhin,
Ka sakruang ruam leh pang
I kuta i fan kual vel ruai a,
Duh taka kan inpawm chial hun tur (Aikaih, 22)
tiin a phuah a. Hla phuahtu hian a duhthusam piah lamah inzêp leh inthup peih lo ṭhangtharte nun a rawn pho lang tel bawk a ni.
Ṭawng tuallenga hla phuah chungchangah hian ngaih dan inang lo, a hnualsuat pawl leh pawm duh pawl an awm mek bawk a, Lalrammawia Ngente chuan, “Ṭawng tuallenga phuah kha a nêp bik lova, a thu phûm a puan chhuah kha a pawimawh ber a ni,” a lo ti ve bawk.
Khawvel Hmasawnna Avangin
H. Laldinmawia chuan, “Ram reng reng transition period-a a awmin an literature-ah nghawng a nei a, mipuite’n thu zangkhai leh humour lam an ngaina bawk ṭhin,”’ tiin a sawi a. Mizote chu transition period-a ding mek kan ni a, kan tunlai poetry emaw prose lam thlenga kan en pawhin humour lam rawngkai a tam em em a. Tin, hla zangkhai leh hlimawm tak siin mi hringnun chu an puangchhuak bawk ṭhin. Febry K. Zonunmawii chuan,
Mi nei nung khan a khalh chhuak a Car,
A neihnunna hmaah nula an Kâr,
An bêl ngun viau tourige lodge and bâr’
In a sim theih mawlh lo zu,
Zanlaiah tuisik a zawng du du,
A hmel lah chu a chhe vei fu (Chawlhna Thingthiang, 135)
ti tein nuihzathlak tak, dik fu si, khawi emaw laia tu emaw te nun dan chu fiah takin ṭawng tualleng mai bâkah hnam dang ṭawng kan tihte nena kaikawpin fiah takin a rawn sawi a, han chhiar mai pawhin mitthlaah a hmuh theih hial a, pictorial expressiveness an neih ṭhatzia bakah, ṭawng tualleng leh thu zangkhai leh hlimawm tak hmanga hringnun an puan chhuah thiamzia a tar lang bawk.
Tin, hla zangkhai tak te chu he changkanna leh intlansiakna sang takin hmun a chan thuk em emna khawvelah hian mihringte chawlhna pe tur leh thawi dam turin an pawimawh hle a. Chutiang hla zangkhai tak tak phuah a, mi rilru chawk thova tiharh tur chuan hlarua, mi nawlpui hriatthiam nghal mai loh, a ṭhen phei chu un tak tak te chu hman a lo rem lova, hla thu awlsam tak leh zangkhai tak an mamawh ta a. Peka Fanai chuan,
Dam Dam Dam Dam
Vanah kai daih rawh se,
Chung lam thlir la nipui nuam a inher mek,
Hahdam hahdam thingkung sang mawite,
I zar mawi pharh la
I hnah no a chawr dawn e’
tiin, thilsiamte chu mihring anga biain, thilsiam dangte hmangin mihring nun ipik leh chau ṭhin chu a fuih harh a. ‘Dam dam dam’ tiin a ṭha zawnga thil thlir a beiseina nei tlat tur leh a theihna te chu hmanga, indawm kun reng lova khawvel tana ênga inzar chhuak turin ṭawng tluangtlam pangngai takin mihring nun tar langa fuih pahin thiam takin a tar lang a, a thu chah hi mihring nunin a mamawh bân loh a ni bawk.
Tin, tunlai poetry-ah hian nature lam te chu la tel zel bawk mah se nature nen kan inhne rem ta lo hle a, khuarel mawina thlir hman lo lêkin mihring kan buai a. Khawvel a changkang zel a, changkannain min luhchilh rualin Mizo culture pawh a danglam tial tial a, social media te chuan min thlun zawm telh telh bawk avangin hnam dang ṭawng leh kan ṭawngte pawh inpawlh sawpin, hnam dang ṭawng tam tak chu kan ṭawngah kan lo la lut chho ve zel bawk a ni.
Ṭawng Ṭhan Danglam Zelna Avangin
Mizo hla hlui Bawhhla leh Hlado te, Thiam hlaah te chuan Paihte leh Pawih ṭawng a tam hle a, ṭhangtharte tan chuan hriatthiam har tak a ni. Nunphung a inher danglam rualin ṭawng pawh a inher danglam zel a, thumal thi tam tak a awm laiin piang thar pawh a awm ve zel a. Ralluaii Chhangte chuan, “Hun kal zelin ṭawng a tihdanglam dan ngaihtuahin…han ngaihzáwn chuan tuna Mizo ṭawng hla thu kan tihte pawh hi hun eng emaw laia kan pi leh pute tan chuan ṭawng dan pangngaia an thu hman a nih nual a rinawm,” (Mizo |awng Zirzauna Bu Thar, 46) tiin a ziak a ni.
Mizo ṭawng chu a danglam chho zel a, chung ṭawng danglamna te chu hla lamah pawh a kai vat a, ni tina kan ṭawng tuallenga kan hman sap ṭawng thumalte chu hlaah kan hmang ta zel a, chu chuan a phuahtu sawi tum chu hlarua kan tih te aiin a tifiah ta zawk maha hriat a ni chho a, ṭhangtharte khawvel mahni induhtawkna rilru chu hla lamah an lo puangchhuak chho ta bawk nen, sap ṭawngte nena inpawlh chiata hla phuah te chu kan hmu chho ta a ni. Triau track hlaah chuan,
Ka lenrual lungduh ni lem lo ten,
I over e min ti,
In over e min ti,
Blah blah blah blah,
In over fe…
En teh,
A hmelṭhatzia saw,
A awihawm loh zawk,
Oh My God’
han tih te hian an sawi tum a sawi fiahin, ṭhalaite zingah phei chuan a tla na hle a, ‘over’ han tih te phei chu kan ni tin ṭawnga Mizo ṭawng ang maia kan chelek a ni a, heng hlarua ni lo ṭawng dangte leh slang word te an han hman hian an thu puan chhuah duh chu chiang takin a puan chhuahpui a, a lo dawngsawngtuten an lo hre fiahin mawi an lo ti êm êm bawk a. Tin, chhamhla lamah pawh,
Nih i duh tiraw ka Hero,
I ang mah mah hmanlai Nero,
Pawi ka ti ka tân i Zero (Chawlhna Thingthiang, 137)
ti tein Febry-i chuan a’n phuah bawk a. Hero leh zero te pawh ni tin nuna kan hman ṭawng tualleng a ni a, hetiang hla zangkhai leh hlimawm (humour) hi tunlai taka puan chhuah nan an han hmang a, rilru a tihhlimin a tizangkhai thei hle a ni.
Tin, Mizo hlaraw hlui tak tak te hmanga hla phuahte a la awm zel tho va, tunlai poetry rawn chhuak hi ṭawng tualleng hlanga phuah emaw kan ti fova, mahse ngun taka en chuan modern poet te hian hla raw ṭha tak tak an rawn chher chhuak a ni tih kan hmu. Malsawmi Jacob chuan, “A hlui chu hluihlawn a pawi lo, chu chu kan ngaihhlut loh vang a ni lo va, hmalam panna zawk a ni. Hlaraw thar chher chhuah belh te pawh a ngai a ni,” tiin a lo sawi a.
Tunlai ṭhangthar poet-te chuan hlaraw ṭha tak tak an rawn chher chhuak chho ta a, R Zairemthanga chuan pawisa sawi nan tangkachêng a hmang a, Lonely Pachuau-in mittui a sawina ‘lungtui far’ te, Matlana Vuite-in thihna a sawi nan, ‘Piallei thuah sawmpasarih’ a han ti te leh mi hrang tam takin hlaraw thar hi an chher chhuak zel a, ṭawng tluangtlam satliah ngawtin an phuah bik lo.
Mizo hlaruaa tam ber pawl chu tehkhinna thu simile hi a ni awm e. Hmanlai leh tunlai nunphung inpersan tawh hle avang hian ṭhangtharte tan Mizote tehkhinna (simile) tam zawkte hi an nung sârh tawh lo va. Mi chawh phûrna leh suangtuahna muthlu beng harh turin chakna an nei tawk tawh lo niin a lang. Hei hi a chhan ber pakhat chu an lâr lutuk vâng a ni zawk a. Chhiartu leh ngaithlatu tam takte thinlungah a tehkhinna thil (object) kha lang thei tawh lo khawpin a lâr a, tunlai hun nen a inmil tawh lo a ni a tih theih bawk ang. Entir nan ‘dar ang tawng’ tih hi intawng, inhmu tihna a lo ni a.
Darbu an lei dawn hian ri chi thum inmil tur, d, r, m tichhuak thei tur an zawng a, an tum lawr a, chutianga ri intawng te chu an lei ṭhin a. Ri chi hrang pathum zinga a eng bera pawh kha lo kim lo se awmzia a nei lo va. Hei vang hian inmil tehkhin nan an hmang a ni” (Hla Thu Dictionary, 105).
Tunlaiah chuan dar chu kan hmuh phakah pawh a awm meuh tawh lo va, kan nunphungah hmanlai angin hmun a luah thuk tawh lo. Hmanlaia a hlutna leh a nihphung hre thiam taka an va feel theih ang khan tunlai hunah chuan kan feel thei tawh kher lo vanga, kan mitthlâah a lang kawp thei meuh tawh lo a ni.
Ṭawng chu che reng leh kal reng a ni a, hlaraw hlui tam tak hman nasat em em te chu a lo hmân dâk ve theih a, chu chuan ngai leh ngaiah min kual tirin hmasawnna a dang bet ve thei. Chuvangin hnawl ngai chu hnawl mai a, hlaraw thar emaw hlarua chher thar kher lo pawhin a phuahtuin a puan chhuah duh chu eng tiang ṭawngkam pawh lo hmang se a sawi chhuah duha a sawi chhuahna a nih phawt chuan chu chu a pawimawh ta ber zawkin a lang a ni.
Changkanna leh khawvel nunphung avangin nature nen kan inhne rem tawh lo hle a, chung avangte chuan nature pawn kan lung a len hman meuh lo. Mahni inchhûng lum a angin khawvel kan thlir a, kan suangtuahna kan bun ruak a, hmanlai chuan an hmel duhte leh an mi ngaihte hmelṭhatna leh duhawmzia sawi a chawiin pangpar leh thilsiam chi hrang hrangin an tehkhinin an chawi vul chek chuk ṭhin a, tun hnu deuh thleng pawhin a la ni. Ngurchhawna chuan,
Chuailopari ka di hmelṭha,
Uai thei hianin i mawi nêm maw!
A riang lunglawm biahzai nemten,
I vul lai par aw min thliah la,
Leng dang ka ngai bik tawh lo’ng
O kei ka tan zawng chuailopari
Par mawi kung I lo ni e, (Mizo Hla Leh A Phuahtute 535)
ti tein an phuah kur ngiai nguai ṭhin a, mahse nature nen kan inhnêk rem tak loh êm avangtein kan mi duha te kan duhna leh an ṭhat leh mawina te pawh chu tehkhin leh sep tui duah lovin tlang takin poet te chuan an phuah chho ta a, “I hmel ṭhatna hi ka tan atna,/I zûna uai hi e ka rual pawh lohna” titein awlsam tak si thu pai tam tho si ten an han phuah chhuak a, nature lam tel hauh lovin tlang takin an puang chhuak ta ṭhin a, hengte hi khawvel changkanna vang leh danglam tak em vang a ni ber a, hlaraw ṭha tak tak kan tih ang kha an hman loh mai avang hian an hla hi a nêp ta tihna a ni lova, an puanchhuah duh chiang taka an puan chhuah a, midang nena an va inbiak pawh kha a pawimawh ber ta zawk niin a lang a ni.
Hun inher ruala mihring khawsak dan a danglam reng ang hian ṭawng pawh a danglam reng a. Hmanlai pi leh pu huna an thu leh hla tam tak chu ṭhangthar tan hriatthiam mai awlai lo tak tak a ni tawh a. Hlathu hlui te chu a awmzia hrilhfiahna nena zir thar ngai a lo ni tawh a, hmanlaia an inzirtirna leh ṭawngkauchheh, ṭawng upa kan tihte pawh hunin kan kâr a tihzauh a, kan nunphung a danglam tak em avangin hman zui a hlawh mang tawh lo va, zir thar ngai deuh vek a ni tawh a ni.
Hmanlai hlarua ṭha tak takte hmang chauh khan hla phuah reng theih a ni tawh lo va, nunphung tharin ngaihtuahna thar min pe a, ṭawngkauchheh thar a lo piang ṭhin. Hun hluiah beh tlat tumin insâwr zim tlat ila, hmasawnna a awm thei lo vang. Mizo thu leh hla maiah ṭhangtharte kan inhnangfak zo tawh lo va, hnam dang literature temin chu’ng hmang chuan Mizo literature kan khaikhin lo thei lo va, teh nan leh zir chik nan a upa zawk leh lo changtlung zawk ta chu kan hmang zêl bawk a ni. Hlathu ken leh pai a danglam a, hmasawnna kawng tam takah kan nei zel bawk a, ṭhangtharte rilru leh hmanlai pi leh pute rilru a rualkhai reng thei hek lo, heng zawng zawng hian hlathu hman thuhlaah danglamna a siam ta niin a lang a ni.
Works Cited
- Thanmawia, RL. Hla Thu Dictionary. Lengchhawn Press Aizawl, Mizoram: India. Lengchhawn Offset Bethel House, Khatla. Third Edition – 2016.
- Darchuailova, Lalzuithanga, et al. Lenchawm. Department of Mizo, Hrangbana College, Aizawl; Mizoram. Lois Bet Print & Publication, Chanmari; Aizawl. 2017.
- Zonunsanga, Zothanhlira, et al. Khuanu Leng Chawi Hrawva. KL Offset Prnters, Aizawl. 2020.
- Lalrinfela, H. Chawlhna Tuikam. Gilzom Offset, Aizawl. Fourth Edition : 2017.
- Laldinmawia, H. “Rokunga Hlaa Poetic Diction.” Thu leh Hla, Bu 354-na. July 2017.
- Sangzuala, C. “Pawnto Hla Leh Naupang Hla.” Thu leh Hla, Bu 390-na. July 2015.
- Thanmawia, R.L. Mizo Hla Hlui. Din Din Heaven, Ramhlun south, Aizawl. TM Offset Printing Press, Aizawl. Second Edition : 2020.
- Khawlhring, Ṭhuamtea. “F. Rokima Hlate.” Thu leh Hla, Bu 366-na. July 2013.
- Zonunmawii, K, Febry. Chawlhna Thingthiang. Diktawn Press. 2020.
- Nunmawii, V.L, Anita. Aikaih. TM Offset Printing Press, Canteen Square, Dawrpui Aizawl.
- Chawngthu, P.S. Nghilh Lohna Par. Disola Lyngdoh. Samaritan Printer, Mendus Building, Mission Veng, Aizawl. Revised Edition 2019.
- MILLTA. Mizo Ṭawng Zir Zauna Bu Thar. MILLTA Publication, Aizawl, Mizoram. Felfim Computer, Aizawl, Mizoram. Chhut thumna – 2018.
Cite the original source:
Remruatkima and Lalvensangi. “Tunlaia Hlarua Hman Uar a Nih Tak Loh Chhan.” Mizo Studies, X, no. 4, Dec. 2021, pp. 826–842.
