Thihna Thahrui – Ramlawt Dinpuia Hla Thlirna

Abstract : Ramlawt Dinpuia hian kum 2018 khan kum 21 mi chauh a la nih laiin a hlahril bu hmasa ber Rawlthar Awrawl a lo tichhuak tawh a, hemi kuma Mizo Academy of Letters-in lehkhabu ṭha a thlan chhuah 10 zingah a tel phak a. Kum 2021 Ramtuk thlaa tlangzarh hla 87 awmna Thihna Thahrui bu hi phek 162 a chhah niin a chhuah theihna atan hian Mizoram Publication Board lamin sum leh paiin a pui a, Rs. 120 man niin T.M Offset Printing Press, Canteen Kual, Aizawl te chhut a ni a. A kawm hi a dum pawl lam deuh niin kut pahnih rawn dawh chhuak deuh kan hmu a. A bu hming Thihna Thahrui tih a ni angin a kawma a hawrawp (font) hman hi thlahrang leh thisen lampang nena inhmeh tak a hmang a, a horror hawrawp ngawih ngawih a tih theih. 

 

He lehkhabu han keu phat hian tute tan emaw hlan a nih thu kan hmu a: “Mami,/ hmel hmuh loh natna na tak pawhin a hneh theih loh/ leh / thihna thahrui tal chah tuma bei mekte tan” tiin, hei vang hian he lehkhabu hi mihring nuna a zangkhai lam ni loin a pik lampang hrutna a ni ang tih a rin thiam theih a ni. Shelley-an ‘kan hla duh ber berte chu lungngaihna chanchin pai a ni’ (Shelley 90) a tih kan hre larin kan chelek lar viau a. Chu lungngaihna thlentu pakhat dam thlak hlelh lohna te, hma hun thim riauva hriatna te, beisei tur awm tawh lo nia hriatna te, siam ṭhat theih tak tak a ni dawn chuang lo tih hriatna te, thihna leh natna te, tun dinhmuna lungawi lohna leh natna dang tam takin he Thihna Thahrui hi a bawm a ni. 

 

Thihna Thahrui-a hlate hi hlawm riatah ṭhenin “Suangtuahna”-a bul ṭanin “Mei Alh”-in a dawt a, “Rambuai” kan hmu zui a, tichuan, “Hmun” te, “Hliam” te, “Thim” te kan hmu chho a, a ṭhen sarihna chu hnam dang hla Mizo ṭawnga a lehlin a ni a, hemi hlawmah hian hla pariat a awm a. Thu leh hla letling tur hian kan thu lakna ṭawng leh kan va leh chhuahna ṭawng kha thiam nal ve ve a ngai a. Ramlawta hian lehlin lamah kut chhuak a lo nei nual mai a. William Shakespeare-a lemchan Cymbeline aṭanga lak “Fear no more” hla hi a thupui pakhat zawk “A Requiem” tia dahin a let a.

 

Fear no more the heat o’ the sun,

Nor the furious winter’s rages;

Thou thy worldly task hast done,

 

Turnipui sâ hlau tawh lo la, 

Sikpui lung lian hrang ṭhinte pawh; 

I pian chhan hlen a ni tawh a, (136)

 

A hlawm tawp ber hi a hlawm thupuiah “Haiku” tiin a dah a, Haiku chu internet lama a awmzia kan en chuan Japan ram aṭanga chin chhuah hla tawi te, tlar thum lek lek a ni hlawm a. Haiku hi H. Laldinmawia chuan ‘Japanese tlar thum zai’ a lo ti ve bawk a (Laldinmawia 72). Hei hi sap ṭawngin a ziak ve thung a. Hetah hian hla tawi 46 a awm a, hla pakhat ang pawhin a sawi theih bawk ang.  

 

Mizo Kristianten tun thlenga kan sak lar leh kan duh ber ber la ni zui ta reng lengkhawm hlate hian a lo chhuahna turin hun thim tak Kristian te tih duhdahna te, hripui leng vanga manganna leh chumi avanga thihnain thla a zar mup mup lai boruak te leh Mizo hla kalhmang leh Mizo hla ziarang hrim hrim dodal hun laite a paltlang a. Thu leh hlaa kungpui mi ril chan chan, ṭhangtharte ngaihsan em em Mafaa kha a hringnun kha tluang purh ta se, Kohhran leh khawtlanga inhambuai tak niin kawppui thu-ah pawh tluang takin kal se chu vawiina a thu leh hla kan hmuh tam tak hi kan hmu kher awm lo e. Mahse a nuna harsatna te, kawppuia a vanduaina te, a zu ruih fo vanga te, a nun khawhar rukna avangte khan a rilru a seng nasa a, amah aṭangin thu leh hla tam tak a lo chhuak a nih kha. Ramlawt-a hla tam takte hi natna chi khat, mihring nun thimin a man laia ziah a ni hlawm ngei ang tih a rin theih. A hla pakhat “Engkim a ṭha leh vek mai ang” tihah chuan engkim a ṭhat vek loh thu kan hmu a:

 

Retheih tlakbalna vanga kan mangan lai khan 

Fairel bel a ruak a, 

Mamawh phuhrukna tur kan vai a, 

Mei alhah êng kan hmu lo. 

Engkim a ṭha leh vek mai ang an ti a, 

Engkim ṭhat leh vek hun chu kan nghak chhuak lo 

(Ramlawta, Thihna 125).

 

Ramlawta hi chu Zikpuii pa-in khawvel buaina leh taksa tlansana thlawh bosan daih a chak ang kha ni ve loin ani hi chu a khawvel lai taka dinga, a chhehvela thil dik lo leh tlu chhe mek hrehawm ti taka thlir vawng vawngtu a ni. He lehkhabu hi a thuchah ang nei, a tlukpui thil dang zawn tur ni ta se, Norway mi lemziak thiam Edvard Munch-a lemziak The Scream–a milem, kawtthlera kut pahniha mahni lu dawma au vak kha a inhmeh hle awm e. 

 

He lehkhabu thuhmaah hian thihna thahruiin mihringte min thlun beh tlat thu te, hneh tuma beiin sum leh pai zawng zawng nen tal chhuah tumin bei mah ila thihna chuan min phih thlak hun a neih tho thu te, chu thihna thahrui chu kheng thla zo lo mah ila sakhuana hmang te, hausakna leh thiamna hmang tein hmachhawn huai dan tur kan la dap tak zel thute a sawi a (11). Tichuan thihna thahrui hmanga he lehkhabu lo indin dan a sawi bawk. 

 

A hlate ziah chhuahna atan hian ṭawng tluang pangngai a hmang a, hei hi Romantic poet lar William Wordsworth-a pawhin ṭha a tih ber ang kha a ni. Ramlawta hian a hla ziahna atan hian thu tluang pangngai tak rawn hmangin a rawn rem khawm a, thumal mala kan en phei chuan thumal hriat thiam loh kan nei meuh lo ang. A tluangtlamin hriat thiam a awl a, hre thiam ruaiin inhre mah ila kheh chhuah tur, ngaihtuah zui tur a awm a, thinlung a khawih a, a chhiar lam a nuamin a hla luang a dik a, ngaithlatu nih mai pawh a lungawithlak a ni. A hla pakhat “Suangtuahna Atthlak” hi han en ila, heti hian tluang tlam leh mawi tak siin hla a lo phuah chhuak a: 

 

Kumhlun turah ka lo ngai a. 

Hun ṭiauvutin a chhilh bo rual loh, 

Chhim thliin a chhem nghin zawh loha ngaiin 

Ngaihngam takin ka lo awm a, 

Tlu sawp rup thei a nih ka lo hre lo. 

Hrui fei tak hmanga thlun zawm niin ka lo inngai a, 

A ni, chat mai lo tur hrui chu. (101)

 

Tin, a hlate hi thil a nihna ang khawl khawla sawi chhuahna ni loin a tlukpui hmanga khaikhinna leh hmehbelna (simile & metaphor) emaw, aiding (symbol) eng emaw hmanga sawi chhuahna a ni fo. Entirnan a hla pakhat “Laiking leh Bak” (He hla hi December ni 10, 2019-ah facebook lamah a dah chhuah) hi han chhiar ila:

 

Laiking i hmu tawh em? 

Bâk i hre ngai em? 

Dak chhuak la, hawi kual la, 

Lalna puan ropui nen infam a, 

Mipui rawka laitual lengte zingah khan 

Laiking leh bâk chu i tawng mahna! (42)

 

He hla a dah chhuah hunlai hi Mizoram aiawhtu Lok Sabha MP-in, “We will be supporting this bill” tia Mizo mipui rin loh dan taka CAB a vote hlim kha a ni a. Tin, Congress MLA ni lai pahnihin MNF an zawm hnu a ni bawk. 

 

Ramlawta hian hla phuahtu ṭhain a mamawh ang – thil eng emaw a thlen a lo tuar riauna te, lo lak nat fal bik riauna te a nei ṭha a, ama chunga thil thleng bik ni lo, a huhoa kan tawrh ang chi-ah en liam ve mai thei loin a au chhuak a, chu chu a hla tam tak lo pianna pawh a ni. Hmasang Greek miten ‘hla hi chung lam thil pek a ni’ an lo tih ṭhin thu kan hre lar hle a. Thlarau mi kan tihte pawh hian zir thiamna vang ni loin chung lamin a hmuh fiahtirna aṭangin Bible chang awmzia leh a hmanna turte hi hmu fiaha hre thiam ṭhin niin an insawi ve bawk. Hla chu chung lama miin hla phuahtu hnena a a pek a nih chuan chu hla hriat fiah thiamna pawh chu a petu ṭawngṭaia dil ve mai theih awm tak niiin a lang. C.Luri buatsaih Ka pa Pastor C. Saikhuma tih lehkhabua hla tam tak chu a phuahtu Saikhuma khan a phuah dan a ziak a, mahse hla ṭhenkhat, a phuah chhan a ziah hman tak loh, mahse a phuah dan hriat pawimawh a tih si te chu C. Luri chuan a ziah belh tih “Thuhmahruai”-ah a sawi a. “Pathian hnena ka ṭawngṭaina, ka pa chunga thlarau thianghlim awm keimaha dah tura ka ngen hnu a, hun leh tha, ṭawngṭaina leh mittui tam tak nena ka buatsaih a ni,” (8) tiin a pa hla phuah chhante a hriat fiah theihnan a pain hla a phuah laia a thlarau chan ang chu chantir ve turin Pathian a au a ni. Tichuan he Thihna Thahrui bu chhunga hlate pawh hi hre thiam tur chuan hla phuahtuin a hla mal tin a ziah lai boruak ṭheuh, a ziah laia a chunga thlarau awm chu kan zu var pawh ve phak a ngai dawn a ni. 

 

Ramlawta hlaa kan hmuh hla tam tak hi chu ama mimal thil ni loin pawn lam thil a thlirna a ni a, a hla khawvel hian a huam zau hle a, chutih rualin a mimal thlirna anga ngai tan chuan a hlate hi subjective poetry huangah an khung tho awm e. Ziak mi leh hla phuahtu tam tak, a bikin kum lama naupang zawkte hian hmangaihna leh luanliamna lampang hi an ziak nasa a, Ramlawta hlaah thung hi chuan nula tlangval inhmangaihna lam hi awm ve bawk mahse chu chu a pui ber a ni phak lo. A hlaah hian Mizoram politics te, India ram politics te, sakhuana te, chi inthliarna te, zalenna inrahbehsak chungchang te, rorelna dik lo chungchangte kan hmu tam em em a. Tin, a hla hi awmze pakhat aia tam nei thei, a chhiartuin a hrilh fiah dan, a hriat thiam dan azira awmze dang nei thei, kawh dang nei thei te pawh a awm tam hle awm e. Entirna atan “Khualzin” hlaah chuan mi pakhat, a hna kalsana ram buai laia mipui ṭanpui tura lo chhuak, a hnuah mi pamham rualina an lem zawh tak a awm a, chutiang ni thei awm Zoram politics-ah mi pahnih ka mitthlaah an awm a, IPS kalsana ram buai laia politics a lut Lalduhawma leh Shillong lama inbenbel tum Brig. Ṭhenphunga Sailo te.

 

Mizo zingah thawnthu leh lehkhabu an chhiar aṭanga hla ziak hi an tam kher lo ang. Kum 1983 daih tawhah khan Kulikawn tlangval Fam Lalzuithanga thawnthu tawi ziah zinga thawnthu palite chu Aukhawk Lasi tiin a bu a tih chhuah a ni a. Aukhawk Lasi lo chhiartu Saitluanga chuan thawnthu boruak aṭangin “Tawnmang Lasi” tih chu a phuah a. Ramlawta pawh hian C. Lalnunchanga ziah Kawlkil Piah Lamtluang lehkhabu a chhiar aṭangin “Natalia” tih hla mawi tak a phuah thei a, hei hian thawnthu ziaktu Taitea themthiamna a lantir rualin hetiang taka chhiar leh chham hla mawi tak phuah chhuak theitu Ramlawta a fakawm hle.

 

A hlaah hian intihsiakna emaw hun bik eng emaw puala phuah ni awm tak “Gandhi hre reng rawh u” tih te pawh a awm ve a, mahse a tuihnang em em thei zel a. Nu anga Mizoram a biaka, a ṭahna hla “Chunnu” tih te, hla phuahtu pakhatin “Siam loh dana awm chu tuai anga awmna” a tih a rawn khen thlakna “Chhimbal” tihah chuan “Siam anga i awm tak avangin/Siam loh dana awmah an puh che a” a tihna te hi sawi zel a chakawm ngawt mai. Rambuai lai chungchangah te pawh “Ka pi a ṭap ṭhin” tiin a piin rambuai lai sawi harsa a tihzia a sawina te, Zawlkhawpui sen mei chan ni “March 5” a phuahna te, “Laldenga” a phuahna te sawi tur a tam khawp mai. 

 

Tin, troll hming chhala Mizo mipa tam takin Mizo nulate an diriamna kara Mizo hmeichhiate thlavang a hauhna te hi a thuk a, hetah hian Mizo hnam tan darthlalang fiah tak a hung a ni. 

 

Zo thlifim leh sumtual nuam a kalsan a, 

Hriat ngai loh lamtluang chu chhui turin….

Mittui leh thlantui nen a sual a,

Chunnu ṭawngṭaina chauh lo chu 

A tan chawlhna reng a awm ve lo. 

Chhaih leh chhâi, dem leh deu a ni a,…

Tu khuain nge pasalṭha ramchhuak nuihzat a, 

Khawi ramin nge eizawngtu hmusit ngai? (58) 

 

Kum 2020 March thla tir lam khan lemchan pho chhuahna hmuna lemziak pakhat chu MNF ṭhalai lamin an senghawi daih mai a. A hnuah lem ziaktu demna lam hawite thlengin an party mi leh saten thu an chhuah a. Tin, lem ziaktu lam pawl lah chuan chu lemziak an pho chhuah tel vang chuan thupha an la chawi ta deuh deuh a. Chuta artist te zalenna bo ta chu Ramlawta hian pai dam thei loin heti hian a lo chham chhuak a,

 

Zalenna sualtu khan zalenna an rap hrual a, 

Zalenna atana ding kha zalenna hmelma an chang ta. 

I aw khuh turin bur chhia an khawng ri a, 

Tamna hmanga vau zam che tumin 

I thla khirhsak che an tum. (40)

 

Kan ram enkawltu, thuneihna fawng chelhtuten kan ram an enkawl danah ziak mite lung a awi zo lo a. Sawrkar hrang hrang kan hrawn tawh a, ring lo mite aia changkang zawk awm tak hi ring lo mite chawmin kan la awm reng si. “Pathian leh kan ram tan” kan ti, ei rukna leh dik lo taka thil tih duhna lak ata kan fihlim chuang si lo, Pathian leh kan ram tan kan ti a, hla phuahtute hla en chuan Pathian kan hre lo a, ram kan hmangaih lo a, Pathian leh kan ram tan kan tih a Pathian hi eng Pathian nge, mi lem Pathian em ni, kan va hlau si lo ve tih mai a awl a ni. 

 

Ziaktu ṭhenkhat chuan anmahni tan chauh an ziak a, nimahsela Ramlawta hi chu kan ta a ni a; kan tan min ziahsak a, kan khawtlang tan, kan sakhaw tan, hma khua eng kan neih theih nana ziaktu a ni.