Ni chhun a liam, zan a lo tlai,
Ka zuapa’n ka chunnêmi a chhai,
Piang tur kei chu ka nu’n min pai.
Pian tirha ta ka ni; Mizo.
Duhsam samah chuan, sappui mingo,
Tunah chuan kei ve hi – mi bo!
Ka thiam ta lo ka hnam ṭawng,
Ka dâwn phak lo, a pawi dawn a nghawng,
Nang, kei, kan ni, Mizo zawng zawng.
Thiam kan tum lo kan ngaihthah,
Kan ngai nep vel a, sirah kan dah,
Kan dâwn phak si lo a rah (chhuah)!
Kan thiam ve maite kan inring,
A hria, thiam leh thei deuh chu kan khing,
Kan thlir dan hi maw – a… a ṭhing!
Kan ṭawng chu mi kutah kan dah,
Sap mingo ṭawng thiam erawh kan zah,
Kan ring thiam miah lo; kan la ṭah.
Hey! I mawhphurhnna i ṭhut bet,
Thiam loh, peih loh chu i mize nghet,
Vawi tam i tan hun ṭha an ṭhet.
‘Ek ang chauh, mumal awm lo ‘tum’,
A liam, a ral zel a kum a kum,
A tlai mai dawn; kan tha a ṭhum.
Finna zawng, a zatin kan za,
Kan fang, kan dai, kan hai si kan ta,
Kan hmabak hmabak chu maw… ‘pâ’!
In chhawng leh degree chu a sang,
Ṭhuthmun, dinhmun sangah kan inhlang,
I bèl thar teh ang kan hnam ṭâng…
Piannaah kan chiang lo, kan thi,
Kan do zo lo e; changkanna thli,
Ni lo lamah kan phi kan phi!
Harh a hun mang e maw Zofa,
Mizoa piang, Mizo ni ta sa sa,
I ṭawng pawh ngaihlu teh; kha kha.
A bo a bang awm lova bangbo,
Kan ṭawng, kan grammar leh kan chanvo,
Eng kim mai hi kan ngaihthah fo.
Nang tal chu harh la aw ‘zirlai’,
Kan hnam leh kan ram tan ṭan a ngai,
Vawiin, naktuk leh kan ṭhatlai.
