Abstract : Mizo hla phuah thiamte zingah hian Pathian thil siam tuipui a, an hlaa tar lang ṭhin mi eng emaw zat an awm a, chung zingah chuan Vankhama hi a langsarte zingah a telh theih awm e. Zikpuii-pa te, Rokunga te pawhin Pathian thil siam hi an hlaah mawi leh ropui tak takin an tar lang a, an chhunawm hle. Vankhama hian eng angin nge Pathian thil siamte chu a tar lan ve tih sawi kan tum dawn a ni.
Key words: Pathian thil siam, nature, Rokunga, Zikpuii-pa,
Tlaizawng par
Tleitir sakhmel ianga Tlaizawng par (5)
tih zaipuitu tho hi,
Chhakah vulmawi senhri par a iang reng kha (15)
tiin zai a vawr bawk a; a eng zawk nge a lak thutak zawka a tuipui zawk tih hriat a harsa khawp mai. Heng hla pahnihah hian mize inpersan tak, lianpui Naturalism leh Humanism a lang rual mai. A khawi lam lama ṭang pawhin ṭanchhan tur an hmai lo ve ve ang.
Vankhama leh Zikpuii-pa te hian naturalism leh humanism an hmer kawp ve vea, Zikpuii-pain “Sik Ni Eng” tih hlaah,
Tleitir sakhmelin a cho lo che
a tih laiin, Nunna Kawng Ṭhuampuiah tih thawnthuah chuan heti hian a aupui bawk a:
A hmelah chuan…, ni eng leh zan thim te hian ngaihawmna rawng thar an inthuam a…, amah chu mawina a ni… thil awm zawng zawng timawitu leh tihlimtu…, kei ka tan chuan Ngurthansangi a lo ni (173).
Heng thil pahnih thlur hrang lianpui hi thu leh hla tupuitu tan chaw tui tak a ni reng awm e.
Khawvel hmun hrang hranga hla phuahtute tan Nature hi chăk lakna hnar ṭha tak a ni reng. Rousseau-a thupui auchhuahpuina (doctrine), “Return to Nature” tih bu hian khawvel hausakna sum leh pai ngawt uma phe pheho rilruah chu lam uma tlan vak ai chuan Nature lama kir leh duhna rilru a puttir nasa khawp mai. Nature awm dan aṭang hian hlim leh lawmna chuai thei lo, hlimna sang tak hmu zawk turah an inngai a ni.
Romantic Revival an tih kalpuitu langsar zingah Wordsworth chu nature ngainaa pathian biak ang hiala betu (worshiper of Nature) a ni. Nature-ah khuanu a hmuh ṭhin avangin, a inpuanna hrang hrang aṭangin a pawlna (Divine Spirit) a chang a, a hlimpui ṭhin. Coleridge-a pawh hi supernatural tuipui tlut mi a ni chungin, Nature ngainaa dah pawimawh em em mi a ni bawk. Shelley-a pawh hi Nature nen thuk taka inkungkaih a ni a, Nature-ah hian chatuan Pathian inpuanna a hmu a, a pawlna a chang ṭhin. Keats-a hian Nature mawina a tuipui ber a, khuanu (mystical) inpuanna lam aiin mita hmuh theiha a mawina a tuipui zawk an ti ṭhin. Poet leh nature chungchang sawiin Arthur Compton Rickett chuan heti hian a ti a:
Wordsworth-an Nature leh thlarau thil a suihzawm laiin Shelley-a chuan Nature leh chhia leh ṭha hriatna, finna leh thiamna a suihzawm thung. Keats-a hian finna leh thiamna hmanga Nature puanzar hi a lungawipui a: a rawng mawi te, a rimtui tak te, han nawk vela nêl tháp te, mi tiphur leh chawktho tak rimawi a siam ṭhin te chu amah khawihtu leh sang taka hlangtu a ni. Khawvel leh a chhunga thilsiam chi hrang hrang, hunpui inthlakte hian an tiphura a rilru khawih lo a awm lo (344).
Vankhaman nature a thlir dan tawitein a hnuaia mi ang hian han thlir ila:
1. Nature Mawina a Tuipui (sensuous delight)
Vankhama hian Nature hlimawmna sang ber (paradise radiance) a hlimpuia, a hriatna thazam luahin Nature-in hlimna a thlenah chuan a lawm tawk em ema, hmuh mai theiha hlim leh lawmna a thlen ṭhin chu a lungawipui em em a ni. Chhimbal rawng mawi tak te, pangpar rimtui leng vel te, sava hram mawi tak tak te, thing hnah han khawih zawnga nêl tháp te chuan a tilawmin hlimna ropui tak a thlen ṭhin.
Thil mawi leh duhawm chi hrang hrang- Ainawn, chuailo, farṭuah, vau, senhri, thangrei, nihawi, nipui zam, tlangsam, herhse, khiang, ngiau par romei, hnah hring ram ngaw, thla eng tihten siamtu kutchhuak pangngai an nunpuia an pu ang chiahin a hlaah hian an vul chuk mai a; heng hian Nature a hlimpuizia leh pawn lam lang theia an mawina a tuipuizia a lantir awm e.
Nature chu mawina lallukhum khumtirin mawina lalnu (Queen of Beauty) a ti hial mai. Khawvelah hian thil mawi a tam khawp mai: Pathianin a siam danah mipa tan hmeichhia hi an mawi a, hmeichhe tan mipa an mawi a ni. Vankhama hian hmeichhe mawina phur turin pangpar chi hrang hrang a hmang a, a nula duhawmna, mawina, hmelṭhatna tilangtu atan pangpar a lek fo mai; a hlaah hian chutiang thil chu lak tur a awm ṭeuh a ni.
“Awm Khawhar Lenkawl Ka Han Thlira” tih hlaah hian a duhaisam nula chu ṭuangṭuah par nen a tehkhin a; chu chuan mita hmuh mai theiha Nature mawina a ngainatzia a lantir a; heti hian a zaipui a ni: “Kum sul mah hlei te’n a dang leh ṭhin,/Ṭuangṭuah par zamual a liam tawh hnu-/Hian mi dawn vein ka ring lo che (9-11)” A bialnu hmelṭha em em mai, ngaihno bei, duhawm tak, a tel lova chhun ni rei leh zankhua hrui ang sei a tih ngawih ngawih zunzam tilang turin farṭuah par sen mawi tak a lek chhuak a; hei hian Nature a hlimpui dan a puang nghal bawk. Nature-in hlimna a pek chu a hril a ni.
He thinlung bawk hi “Zawlkhawhermawii” tih hlaah pawh hian a nemkai a; heti hian a kurpui a ni: “Kei zawng ka tan Aitenawn suihlung hnem i,/Chhaksenhri par ianga leng Zawlkhawhermawii (7-8)” A bialnu duhawmna, zun a ngahzia tilang turin Ainawn leh senhri a thlang a ni. Tehkhin nana a thil lek chhuah (vehicle) leh a tehkhin dan hian thil mawi a pawm dan an hril thui viau a ni.
“Hmangaihna” tih hla pawh hian heti hian a aupui a: “Chhakah vulmawi senhri par a iang reng kha;/Kan hel kan hel ang che vangkhua mawi leng hi (15-16)” A thinlung hlimthla, a rilru vah vel dan nemkai nan nature bawk a hmang a ni.
2. Nature Ngaisangtu (adorer) a ni
Vankhama hla danglamna tak leh a tikhirhkhantu tak pakhat chu hmangaihna zai leh Nature zai a herhkawpa a tahkawp tlat ṭhin hi a ni. “Zawlkhawhermawii” tih hlaah hian Nature leh nula hmelṭha a ngaihdan chiang takin a hmuh theih a; heti hian a zaipui a ni: “Kei zawng ka tan Aitenawn suihlunghnemi,/Chhak senhri par ianga leng Zawlkhawhermawii (7-8)” Hmangaihna zai leh Nature zai chu dak thlarhin a tahkawpa, a zai pakhat zawk lak chhuah tum chuan a pahnih hniha tihchhiat a ngai a; a hla pumpui pian hmang, a thu luang (rhythm and meter) a tidanglam vek thei ang.
Vankhaman hmangaihna leh Nature a thlir dan inphiar zawm khirhkhan zet hian ngaihtuahna chhung ril, thiamna, finna (intellect) a khawih che awm e. Pangparin a zia chhuaha rei lo te chhung chauh a vul ṭhin chu khawngaihin, a siamtu hnenah hei aia rei zawk vultir turin a ngensaka, mi tam zawk hnena lawmna sang zawk thlen a dilpui a ni. “Tlaizawng Par,” tih hlaah chu a ngenpuina chu heti hian a aupui a: “Aw, engah mawi tin thang dang zawng pawh,/Chul mai tura Khanun a siam le? (23-24)” Nature a chan chauhna lai nia a hriat chu a tuarpuiin, engkim titheitu hnenah ngenpuiin, inhmangaihte khum chu tihringa timawi zual turin a ngen a ni. Nature mawina ngaisangtu a ni a; Nature a duhna leh ngainatna hian finna thu ril (philosophical and intellectual) a pai a ni.
Wordsworth-an Nature a pathian dan chungchang sawiin Cazamian chuan heti hian a ti a:
Wordsworth-a tan chuan Nature hi thil dang zawng zawng aia chungnung zawka thil siamṭhatu a ni a, finna leh thiamna zirtirtu, thinlunga chi thehtu, thil vei leh rinna duangtu a ni… Nature chu finna leh ṭhatna kawnga hruaia zirtirtu a ni: chhia leh ṭha hriatna chawkthovin Pathian awmpuina a chantir ṭhin (1010)
Wordsworth-an nature ngaisangtu a nih thu hi “Tintern Abbey”-ah aupui nasa ngiang mai.
Wordsworth-a ang bawkin Vankhama pawh hian Nature a ngaisang a, a engkima engkim a nih avangin a tan thawk zel turin a intiam a ni. A mizia zawng zawng hi nature duansak niin a ngai a, hlimna sang ber thlenin a hria a ni. A tan chuan nature hi ṭhian ṭha, a nuṭapa enkawltu, a kawmngeih ber a ni.
3. Lungngaihna leh Lawmna An Inṭawm
Vankhama hian rei lo tĕa chul leh mai ṭhin pangpar zawng zawng tan Siamtu a ngensak a; “Tlaizawng Par” tih hlaah heti hian zai a vawr a ni:
I păm em chul leh uăi mai tura’n,
Tharin kumsulah lo vul leh la.
Aw, engah mawi tin thang dang zawng pawh,
Chul mai tura Khaunun a siam le? (21-24).
An mawina a ngaisang a, an tuarna a ṭawmpui bawk avangin, a rilru putzia tilangtu tak ngenna a aupui a nih hi. “Rimawi Ram” tih hlaah pawh Nature chu ṭhian ṭha ber, a tleipuizia heti hian a aupui a: “Kan Zoram, Rimawi ram leh thiang karah,/Herhse, Khiang leh Ngiau par rimin min thawi; (9-10)” Vankhama tan chuan Nature hi inthawina zu nia! Herhse, Khiang leh Ngiau par, mawina leh an rimtuina chuan a thawi veng veng a, a phurrit, a lungngaihna chhumpui a chhemkiansaka, a rilru tawt an tihthawlsak a ni.
“Mahten Kawlkunga Tlaitla Ka Thlir a,” tih hlaah pawh heti hian a aupui a: “Mahten kâwlkûnga tlaitla,/Ka thlir a ngui ruai e (1-2)” Nature chuan a lunglenna an ṭawmpui avangin ni tla eng mawi tak pawh ngui ruaiin a hriaa, phur lo zeta kawla liam hnu hnuin angin min thlirtir a nih hi.
Lungngaihna leh manganna chauh intuarpui lovin hlim leh lawmna pawh an inṭawn tlang ṭhin. Chu thil tak chu “Tlai Tlain Zuk Liam Lul Rawh” tih hlaah hian zaipuiin heti hian a ti a:
Chhawrthla eng a pawl riai karah,
Chung si-ar lo thingdim se;
Hrai duhleng zawng vangkhaw zawlah,
Lenthul zai sumtual mawiin (21-24)
Naupang pawntova hlim em em mai hlimna chu thla leh arsi te pawhin ṭawmpui ve nia a ngaih avangin, lo chhuaka lam thaiho turin a sawm a nih hi.
4. Personification
Vankhaman Nature a sawngbawl dan dang leh chu thil nung ang maia chantirna (personification) hi a ni. A hla ṭhenkhatah Nature chu thil nunga chantirin nunna nei ang maiin a sawngbawl (personifies) a, naupangin thil an lawma an hlimna ang mai hian nature a thlir ṭhin. Dilchhut tak, fiah zel duhna rilru a pua, chu chuan thil ropui tak a hring ṭhin. “Mahriak Ṭuanna Khua Hei Ang Zauva’n” tih hlaah heti hian a aupui a: “Aw, suihlung vai sumtualah va ngiri,/Mah ten ka chung eng chhawrthlapui;/Kei mi iangin a ngir thangvan zawla’n, (5-7)” He hlaah hian Thla (Moon) chu nunna nei anga sawngbawlin, lungleng ve thei angin a lantir a; lunglenna pawh mi dang ṭawmpui ve thei angin a zaipui a ni.
“Chung Lumlai a Hrang Turni” tih hlaah pawh Ni chu nunna nei angin a sawngbawl (personify) a; heti hian zai a vawrpui a ni: “Chung lumlai a hrang turni khan,/Ka biah zai lo ngai ve la;/Tlaitla liam tawh la kawlkungah (1-3)” Ni chu ṭhian kawma kawmin a be mawlh mawlha, ṭhianṭha thu hrilh ang maiin thlang lenkawla her liam thuai turin nel takin a ngen a nih hi. “Tlaizawng Par” tih hlaah pawh hian nature chu ṭhiante biaka biain heti hian a zaipui a: “‘Vulmawi’ ka ti ang che hming lem an;/Theih chang se kumtluangin vul reng la,/An sawi Chuailopar ni mai teh la (6-8)” Tlaizawng chu ṭhian hnai tak kawm ang maiin a be mawlh mawlh a, koh duat nan ‘Vulmawi’ ka ti ṭhin ang che a ti a nih hi.
5. Nature chu Pathian inpuanna (Mystic view)
Mysticism literature chuan Siamtu leh Nature inkungkaihna, thilsiama Siamtu inphum, a tel ve na, a inpuanna a tuipui ṭhin. Nature leh Siamtu inzawmna a thlir a, nature chu Pathian inpuanna angin an ngai ṭhin.
S.N. Arora chuan heti hian a ziak a, “Wordsworth-a chuan … Nature-ah Siamtu a hmu a, kawng hrang hranga Pathian inpuanna chu nature-ah lo lang chhuakin a hria a ni (43),” Wordsworth-a ṭhianpa, Aubrey De Vere pawhin heti hian a ti bawk: “Wordsworth-a chuan Nature chu Pathian nihna puangtu, Thlarau Thianghlim duhzawng inphumna,…thlarau lam thil thuk tak inziahna niin a ngai… (26-27).” Wordsworth-a ang bawkin Vankhama pawh hian Nature hi Pathian inpuanna angin a ngai ve tho mai. A ngaihdan chuan Nature hian nunna a neih bakah thil hre ve thei niin a ngai a; mihringin a neih chi hrang hrang- nunna, hriatna leh suangtuahna nei angin a tarlang ṭhin.
He a ngaihdan hi, “Ka thlir zel” tih hlaah khan tarlangin, Nature chu mi pakhat angin a bia a; heti hian a ngen a ni: “Thlangtlai zamual a liam dawn maw?/Mualpui, nuar lang, kai lai kham rawh (6-7)” Nature-ah Pathian a hmuh avangin, a thiltihtheihna chu chawhthawha a harsatna sutkiansak turin a ngen a ni. A hmangaih ngawih ngawih chuan hawsan tumin phurhlan a siam a, a thiam tawpa a thlem chung pawhin a tum a ṭhulhtir thei lo. Chutah tak chuan mihring aia thil tithei zawk Nature chu a pun ta chawt mai a ni. Nature-a Pathian bet tlat chu chawk thovin a bialnu mual liam tur lo danga a chungnunna, mihring theih baka a thiltihtheihna lantir turin a ngen a ni. Chu a manganna laka chhanchhuak turin thiltihtheihna ropui tak neia a ruat Nature chu a bialnu hmina haw a tum ṭalh chu ṭhulhtir turin a ngen a nih hi. He a ngenna hian nature chunga a rilru put hmang a nemkaia, harsat manganna ata chhan chhuak turin a ngen a nih hi.
Works Cited
- Arora, S. N. John Keats and His Selected Poems. Student Store, Bareilly, 2002.
- Cazamian Louis Francois. A History of English Literature: Modern Time (1660-1914). J.M. Dent & Sons Limited, 1926. Macmillan India ltd, 992.
- Dahrawka, P.S. “Tualvungi and Zawlpala.” Mizo Thawnthu. Fourth Edition 1994.
- Fanai Lalsangdeli. “Vankhama leh a hlate.” Mizo Hla leh a phuahtute. General editor. B. Lalthangliana, Hrangbala College, 1999.
- Lalzuithanga. “Lengdun ila.” Thangzui. Edited by Laltluangliana Khiangte, Published by LTL Publication, 2016
- Rickett, Arthur Compton. A History of English Literature. Thomas Nelson and Sons Ltd, 1953.
- Schorer Mark. “Techniques as Discovery.” Twentieth Century Criticism. Editor Handy J. William. Light & Life Publishers, 1974 (Indian Edition 1976).
- Wordsworth, William. Tintern Abbey: Wordsworth Poetical Works. Thomas Hutchinson. Oxford University Press, 1978.
- Zikpuii-pa. Nunna Kawng Ṭhuampuiah. MCL Publication, Khatla Aizawl, 1989.
Cite the original source:
Renthlei, Darchuailova. “Vankhama Nature Thlir Dan.” Mizo Studies, X, no. 4, Dec. 2021, pp. 817–825.
